Амбасадар Беларусі ў Расеі Уладзімір Сямашка заявіў, што Лукашэнка і Пуцін падпішуць усе «дарожныя мапы» падчас візіту Аляксандра Лукашэнкі ў Маскву, паведамляе агенцтва ТАСС.
«Мы, дзякуй Богу, праз тры гады знаходзімся на фінішы, калі з 28 карт засталася адна. Апошнюю, я думаю, мы 7-га чысла [Верасень] даціснем, і ўжо 9-га чысла прэзідэнты сустракаюцца ў Маскве, дзе будуць падпісаныя ўсе дарожныя карты і карты развіцця паглыблення інтэграцыі», – сказаў ён.
Абноўлена. Беларускае дзяржаўнае агенцтва БелТА выдала вечарам 31 жніўня ўдакладненне: кіраўнікі дзяржаваў 9 верасня толькі абмяркуюць «саюзную дзяржаву», а пра падпісанне імі дарожных мапаў гаворка не ідзе. ТАСС выправіў цытату Сямашкі і дадаў, што падпісанне можа адбыцца 10 верасня на паседжанні савету міністраў «саюзнай дзяржавы».
***
Лукашэнка і Пуцін сустрэнуцца ў Маскве 9 верасня. Раней агенцтва Белта паведамляла, што падчас гэтай сустрэчы яны яшчэ раз абмяркуюць саюзныя праграмы, падрыхтаваныя ўрадамі дзвюх краін, а таксама іншыя актуальныя пытанні двухбаковага парадку дня і міжнародную праблематыку
Распрацоўванне інтэграцыйных дарожных мапаў сталася вынікам крызісу ў беларуска-расейскіх стасунках, што пачаўся ў канцы 2018 года. Аляксандр Лукашэнка хацеў атрымаць ад Расеі кампенсацыю за падатковы манеўр, зніжку на газ і зняцце ўсіх абмежаванняў на доступ беларускіх прадпрыемстваў на расейскі рынак. Крэмль у адказ заявіў, што гэта магчыма толькі пасля паглыблення інтэграцыі ў межах Саюзнай дзяржавы.
МГМ, belsat.eu
