Ужо тры гады беларускія ўлады чакаюць кампенсацыю за расейскі закон, які прывёў да росту цаны на нафту для Беларусі і зніжэння беларускіх мытаў на нафтапрадукты. Амбасадар Сямашка кажа, у канцы года дачакаецца.
Амбасадар Беларусі ў Расеі Уладзімір Сямашка заявіў журналістам у расейскім Варонежы, што Беларусь з канца бягучага году пачне атрымліваць кампенсацыю за расейскі падатковы манеўр, піша «Інтэрфакс».
Ён сфармуляваў гэта так: «Пачнецца пэўная кампенсацыя». Але яе сутнасць не стаў раскрываць:
«Вы ўбачыце, гэта будзе адкрытая тэматыка. І гэта будзе пачатак, далей усё будзе развівацца».
Два месяцы таму ў Расеі ацэньвалі магчымую кампенсацыю ў 60–70 мільёнаў долараў, беларускі бок жа ацэньваў страты ў 8–12 мільярдаў долараў.
Тым часам Беларусь не змагла дамагчыся зніжкі на газ.
У ліпені 2018 года ў Расеі змянілі падатковае заканадаўства адносна сваёй нафтавай галіны такім чынам, што нафта для Беларусі падаражала, а экспартныя нафтавыя мыты, якія дазволена выстаўляць Беларусі, знізіліся.
Беларускі бок з таго часу патрабуе кампенсацыі. Менавіта ў сувязі з гэтымі патрабаваннямі ў канцы 2018 года быў агучаны «ўльтыматум Мядзведзева» аб абнаўленні «саюзнай дамовы» Беларусі і Расеі, а ў пачатку 2020 года спыняліся пастаўкі расейскай нафты ў Беларусь.
АА belsat.eu