Расея ўжо мае амбасаду ў Менску і генеральнае консульства ў Берасці. Навоша патрэбнае яшчэ адно генеральнае консульства, не паведамляюць.
Амбасадар Расеі ў Беларусі Барыс Грызлоў паведаміў 31 траўня на сустрэчы з кіраўніцтвам Гарадзенскай вобласці аб рашэнні адкрыць генеральнае консульства Расеі ў Горадні. Рашэнне, заявіў ён, «ужо прынятае», але калі і дзе адкрыецца консульства, невядома.
Расея мае амбасаду ў Менску і генеральнае консульства ў Берасці – самым далёкім ад расейскай мяжы горадзе Беларусі. Горадня таксама няблізка ад Расеі: калі ад Берасця да расейскай мяжы каля 500 км, то ад Горадні – каля 460 км.
У Горадні ўжо ёсць генеральныя консульствы Польшчы і Літвы, ганаровыя консульствы Украіны і Кыргызстану. Горадня – пяты паводле насельніцтва горад Беларусі. У Гарадзенскай вобласці падчас перапісу 2019 года этнічнымі расейцамі сябе назвалі 6,38 % жыхароў, тады як у Віцебскай, якая мяжуе з Расеяй і не мае консульства, 12,15 %.
Уладзімір Пуцін прызначыў Барыса Грызлова на пасаду амбасадара ў Беларусі 14 студзеня 2022 года. Грызлоў паабяцаў «шматпланавае» падтрыманне Аляксандра Лукашэнкі і назваў прыярытэтамі «працяг нашай шматпланавай інтэграцыі» і «паслядоўнае збліжэнне ў межах Саюзнай дзяржавы».
Алесь Наваборскі belsat.eu
