Аляксандр Лукашэнка падпісаў указ «Аб развіцці сродкаў масавай інфармацыі», паведамляе яго прэсавая служба.
Афіцыйна паведамляецца, што ўказ «Аб развіцці сродкаў масавай інфармацыі» дазволіць «забяспечыць устойлівае эканамічнае становішча нацыянальных сродкаў масавай інфармацыі, вытворчасці ў неабходным аб’ёме якаснага беларускага кантэнту».
Указ Лукашэнкі прадугледжвае збор за размяшчэнне рэкламы ў памеры 10 % пры размяшчэнні вонкавай рэкламы і рэкламы на транспарце. У іншых выпадках збор складае 20 % ад кошту паслуг па распаўсюджванню рэкламы. Спагнаныя сродкі, якія будуць выплочваць рэкламадаўцы, пойдуць на «падтрыманне дзяржаўных сродкаў масавай інфармацыі».
Таксама, паводле ўказу, стаўка падатку на дабаўленую вартасць вырасце з 25 да 26 %.
Новы ўказ Лукашэнка анансаваў яшчэ 25 сакавіка на нарадзе аб бягучых пытаннях дзейнасці сродкаў масавай інфармацыі. Ужо тады ён распавёў, што пытанні рэкламы ў сродках масавай інфармацыі будуць урэгуляваныя.
«У нас ёсць «Першы канал», АНТ, СТВ, «Мір», газеты, часопісы… Не з пункту погляду толькі прапаганды Лукашэнкі і ў кепскім сэнсе прапаганды. Гэта нармальныя каналы. Дык вось рэклама павінная быць там, а не ў нейкіх шалёных, якія разбуралі дзяржаву і працягваюць гэта паспяхова рабіць, і пасмейваюцца з боку», – заявіў Аляксандр Лукашэнка.