Журналіста Андрэя Аляксандрава і ягоную сяброўку Ірыну Злобіну, якія застаюцца пад вартаю, паставілі «на прафілактычны ўлік як асобаў, схільных да экстрэмісцкіх і дэструктыўных дзеянняў». Пра гэта паведаміў БелаПАН.
Раней на такі ж улік паставілі асуджаную журналістку тэлеканалу «Белсат» Кацярыну Андрэеву, якая цяпер утрымліваецца ў Жодзінскім СІЗА, і некаторых іншых палітвязняў.
Аляксандрава і Злобіну затрымалі 12 студзеня. Іх падазраюць у фінансаванні пратэставай дзейнасці. Паводле МУС, Андрэй Аляксандраў з 22 жніўня да 9 лістапада аплаціў 250 штрафаў. Спісы і грошы на аплату штрафаў Аляксандраву перадаваў фонд «BY_help».
У сувязі з гэтым міліцыянты абвінавацілі Андрэя Аляксандрава і Ірыну Злобіну паводле ч. 2 арт. 342 КК («Навучанне ці іншае рыхтаванне асобаў для ўдзелу ў групавых дзеяннях, якія груба парушаюць грамадскі парадак, а таксама фінансаванне і іншае забеспячэнне такой дзейнасці»).
Супраць людзей, якія атрымлівалі дапамогу , таксама завялі крымінальную справу. Улады дамагаюцца, каб яны выплацілі штрафы другі раз.
Праваабаронцы лічаць дзейнасць Аляксандрава і Злобінай законнаю, а пераслед іх з боку ўладаў – палітычна матываваным. Іх прызналі палітвязнямі.
AB, belsat.eu