Святлана Ціханоўская перадала прадстаўнікам ЕЗ імёны людзей, якіх варта ўключыць у санкцыяныя спісы

Як паведамляе прэс-служба Святланы Ціханоўскай, асаблівую ўвагу прапаноўваецца звярнуць на Мікалая Карпянкова, экс-кіраўніка ГУБАЗіКу, цяперашняга намесніка міністра ўнутраных справаў.

Адпаведная інфармацыя была накіраваная прадстаўнікам ЕЗ на гэтым тыдні.

«У ЕЗ перададзены спіс імёнаў для ўнясення ў санкцыйныя спісы. Ціханоўская заклікала звярнуць асаблівую ўвагу на асобу Мікалая Карпянкова. Юрысты падрыхтавалі неабходныя доказы», – адзначае прэс-служба Ціханоўскай.

«Зрабіць лагер – і калючы дрот па перыметры». «ByPol» апублікаваў запіс голасу, падобнага да Карпянкова

Адзначаецца, што чацверты пакет санкцыяў супраць рэжыму Аляксандра Лукашэнкі ўжо рыхтуецца. 29 студзеня Ціханоўская сустрэлася з прэмʼер-міністаркай Літвы Інгрыдай Шыманіце (Ingrida Šimonytė), якая паабяцала ўзмацніць ціск на рэжым Лукашэнкі і заявіла, што падтрымлівае пашырэнне санкцыяў.

Таксама на гэтым тыдні было ініцыяванае стварэнне інструменту для міжнароднага расследавання парушэнняў у галіне правоў чалавека ў Беларусі.

«Кааліцыя групы краінаў, у тым ліку Нямеччына, прапаноўвае правесці расследаванне пры ўдзеле аўтарытэтных міжнародных НДА і беларускіх праваабаронцаў», – кажуць у офісе Ціханоўскай.

  • Мікалай Карпянкоў – адзін з самых адыёзных сілавікоў, якія бяруць удзел у масавых рэпрэсіях 2020–2021 гг. Пад ягоным кіраўніцтвам ГУБАЗіК пераўтварыўся ў адзін з галоўных органаў палітычнага тэрору. У тым ліку байцы ГУБАЗіКу ўдзельнічалі ў нападах і збіванні мірных дэманстрантаў падчас акцыяў пратэсту, а Карпянкоў асабіста кіраваў гэтымі дзеяннямі. Таксама Карпянкоў публічна абяцаў выкарыстоўваць агнястрэльную зброю супраць пратэстоўцаў.
  • У студзені ініцыятыва BYPOL апублікавала скандальны аўдыязапіс выступу чалавека, голас якога нагадвае голас Мікалая Карпянкова. На запісы чалавек кажа пра тое, што супраць пратэстоўцаў трэба выкарыстоўваць зброю, каб «пакалечыць, або знявечыць, або забіць», а таксама распавядае, што для ўдзельнікаў вулічных акцыяў плануецца ствараць спецлагеры. BYPOL сцвярджае, што гэта запіс выступу Карпянкова перад асабовым складам ГУБАЗіКу ў кастрычніку 2020 года.

Святлана Ціханоўская пра санкцыі ЕЗ супраць Лукашэнкі: Гэта несур’ёзна

ІІ belsat.eu

Hавiны