Савет Міністраў зацвердзіў праграму патрыятычнага выхавання беларусаў на 2022-2025 гады. Згодна з пастановай, для гэтага плануюць стварыць Рэспубліканскі міжведамасны каардынацыйны савет па патрыятычным выхаванні насельніцтва.
У яго ўвойдуць 52 чалавекі, у тым ліку міністр абароны Віктар Хрэнін, намеснік міністра ўнутраных спраў Мікалай Карпенкаў, старшыня КДБ Іван Церцель і кіраўнік Беларускага саюзу журналістаў Аляксандр Шпакоўскі.
У пастанове сказана, што актуальнасць такой праграмы «абумоўлена геапалітычнымі выклікамі, неабходнасцю своечасовага ўмацавання дзяржаўнага суверэнітэту і нацыянальнай бяспекі Рэспублікі Беларусь праз кансалідацыю грамадства і забеспячэнне народнага адзінства».
Справаздачы рэалізацыі праграмы будуць накіроўвацца ў Адміністрацыю Прэзідэнта.
Неабходнасць праграмы тлумачаць тым, што з 2020 года Беларусь «ператварылася ў арэну геапалітычнага супрацьстаяння буйных сусветных палітычных ігракоў, стаўшы аб’ектам непрыкрытага інфармацыйнага, палітычнага і эканамічнага ціску з боку заходніх дзяржаў. Працягваюцца спробы насаджэння калабарацыянісцкай сімволікі, тэндэнцыйныя трактоўкі маральных і рэлігійных прынцыпаў, навязванне беларускім грамадзянам неўласцівых культурных мадэляў. Першачарговым абʼектам дэструктыўнага інфармацыйнага ўздзеяння зʼяўляецца маладое пакаленне».
Фінансаваць праграму плануюць за кошт мясцовых і рэспубліканскіх бюджэтаў, а таксама за кошт іншых крыніц, не забароненых заканадаўствам.
АД, belsat.eu