Мараўска-Сілезская паліцыя Чэхіі затрымала старшыню Беларускай асацыяцыі футболу Уладзіміра Базанава, паведамляе выданне denikn.cz.
Кіраўніка Беларускай федэрацыі футболу Уладзіміра Базанава затрымалі разам з жонкай. Цяпер яны ў адным з паліцэйскіх пастарункаў Мараўска-Сілезскага краю Чэхіі.
Паводле паліцыі, падставай для затрымання стала парушэнне захадаў абароны, якія ўсталявала Міністэрства аховы здароўя праз каронавірус. Базанава і яго жонку затрымалі ў межах планавага правярання па месцы жыхарства.
«Мы таксама вывучаем законнасць іх знаходжання на нашай тэрыторыі ў адпаведнасці з Законам аб пражыванні іншаземцаў», – заяўляе паліцыя.
Раней міністр замежных справаў Чэхіі Якуб Кулганэк (Jakub Kulhánek) паведаміў, што кіраўніка Беларускай федэрацыі футболу Уладзіміра Базанава дэпартуюць з Чэхіі, калі высветляць, што ён на тэрыторыі краіны.
Беларускую федэрацыю футболу абвінавачваюць у парушэнні фундаментальных палажэнняў UEFA і FIFA, выкарыстанні спартовых механізмаў у палітычных мэтах, ціску на суддзяў і футбалістаў праз іх грамадзянскую пазіцыю.
Выканаўчы дырэктар Фонду спартовай салідарнасці Аляксандр Апейкін выказаўся пра затрыманне кіраўніка АБФФ Уладзіміра Базанава.
«Уладзімір Базанаў прымаў непасрэдны ўдзел у рэпрэсіях супраць беларускіх футбалістаў і футбольных спецыялістаў, якія выступілі на баку народу пасля падзеяў жніўня 2020 года, за што і быў унесены ў санкцыйныя спісы. Акрамя таго, Базанаў нясе наўпроставую адказнасць за карупцыю ў беларускім футболе. Мы ўдзячныя прадстаўнікам МЗС і праваахоўных органаў Чэхіі за пільнасць і асаблівую ўвагу да гэтай сітуацыі», – цытуе Telegram-канал «vybory_smotri» словы Аляксандра Апейкіна.
АЯ belsat.eu
