Новы месяц абяцае беларусам узмацненне санкцыйнага ціску на рэжым. Улады тым часам абяцаюць нават паказаць праект Канстытуцыі, які ніхто не прасіў. А што яшчэ чакае нашу краіну ў снежні? Разбіраюцца карэспандэнты «Белсату».
Самай галоўнай тэмай апошняга месяца 2021 года маюць стаць санкцыі. Гэтак, паводле неафіцыйных звестак, 1 ці 2 снежня могуць зацвердзіць пяты пакет санкцыяў Еўрапейскага Звязу супраць уладаў Беларусі. У прыватнасці, у спіс могуць патрапіць «Белавія», «Горадня Азот» і «Беларуснафта», а таксама некаторыя больш дробныя кампаніі і чыноўнікі.
А яшчэ праз тыдзень, 8 снежня, павінны запрацаваць санкцыі з боку ЗША, уведзеныя яшчэ ў жніўні. Адміністрацыя прэзідэнта ЗША Джо Байдэна ўнесла ў санкцыйны спіс 23 беларускіх грамадзянаў і 21 юрыдычную асобу, уключаючы прыватных сыравінных трэйдараў, «Беларуськалій» і Гарадзенскую тытунёвую фабрыку «Нёман».
І гэта яшчэ не канец, бо ЗША з Еўразвязам працуюць над чарговымі абмежаваннямі. Дый Святлана Ціханоўская на 10 снежня запрошаная на арганізаваны Злучанымі Штатамі Саміт за дэмакратыю. Лукашэнку туды не запрасілі. Ягоных саюзнікаў таксама.
Таксама да 1 снежня Беларусі давалі час, каб спыніць ціск на экалагічныя арганізацыі. У адваротным выпадку Менску пагражалі прыпыніць правы ды прывілеі паводле Оргускай канвенцыі, а гэта таксама страчаныя грошы.
Польшча ж з 15 снежня плануе пачаць будаваць капітальную агароджу на мяжы з Беларуссю.
Пры гэтым рэжым нават не збіраецца спыняецца чыніць гвалт і беззаконне, выносіць новыя несправядлівыя прысуды. Гэтак, 14 снежня будуць вынесеныя прысуды блогеру Сяргею Ціханоўскаму, палітыку Мікалаю Статкевічу, рэдактару тэлеграм-каналаў Ігару Лосіку, Арцёму Сакаву і Дзмітрыю Папову.
А 6 снежня пачнецца суд над блогерам Эдуардам Пальчысам.
Пры гэтым рэжым абяцае ў першай палове снежня прадставіць праект новай Канстытуцыі. Але гэта недакладна. З улікам жа таго, што рэферэндум пра яе змены плануецца правесці ўжо ў лютым, часу на абмеркаванне правак не застаецца зусім. Але і гэтая дата дэманстрацыі праекту Канстытуцыі пакуль не канчатковая.
З пачаткам месяца традыцыйна падаражэюць некаторыя маркі цыгарэт. Гэтак, «Тытунь-інвест» на 4-10 капеек павышае цэны на LD, «Monte Carlo», «Camel», «Winston», «Richmond», «Sobranie».
З цыгарэт, якія ўвозяцца кампаніяй «Беларусьгандаль», на 10-25 капеек падаражэюць некаторыя віды «Richmond», «Aroma Rich», «Kiss».
Агулам намеснік кіраўніка адміністрацыі Лукашэнкі Дзмітрый Круты чакае, што ў Беларусі за 2021 год інфляцыя будзе ў межах максімум 9-9,4%. Але гадавая інфляцыя – кастрычнік 2021-га да кастрычніка 2020-га – ужо склала 10,5%.
Чарговыя змены прыходзяць у Беларусь у сувязі з надыходам зімы.
З 1 снежня ў Беларусі, паводле ПДР, машыны абавязаныя мець зімовыя шыны. Гэтая норма дзейнічае па 1 сакавіка. Зімовыя шыны маюць быць на ўсіх колах аўтамабіля.
З 25 снежня сыдуць на калядныя вакацыі школьнікі.
А Беларуская чыгунка з нагоды святаў прызначыла 67 дадатковых цягнікоў, а таксама павялічыла перыядычнасць курсавання цягнікоў у міжрэгіянальных і рэгіянальных стасунках.
З 27 снежня па 9 студзеня будуць курсаваць па найбольш запатрабаваных у пасажыраў маршрутах: Менск – Гомель, Менск – Берасце, Менск – Віцебск, Менск – Горадня, Менск – Магілёў, Менск – Пінск, Менск – Камунары, Горадня – Ворша – Камунары.
Старыя грошы – усё
31 снежня завяршаецца перыяд абмену банкнот узору 2000 года 31 снежня. З 1 студзеня 2022 года банкноты наміналам Br 100, Br 500, Br 1 000, Br 5 000, Br 10 000, Br 20 000, Br 50 000, Br 100 000, Br 200 000 узору 2000 года будуць лічыцца несапраўднымі.
Абмяняць іх на банкноты і манеты ўзору 2009 года можна ў касах Нацбанку, што размешчаныя ў Менску па вуліцы Талстога, 6.
1 снежня адбудзецца прэм’ера гістарычнага фільму «Авантуры Пранціша Вырвіча» кінастудыі «Беларусьфільм». Карціна пра беларускага шляхціча XVIII стагоддзя знятая паводле рамана пісьменніцы Людмілы Рублеўскай.
А вось Нацыянальны акадэмічны тэатр імя Янкі Купалы пасля разгону занадта вальнадумнай трупы ніяк не можа набраць актораў. Чарговы, пяты, кастынг прызначаны на 9 снежня. Набіраюць проста ўсіх ахвочых у веку ад 21 да 65 гадоў. Але ці не прасцей такім чынам хадзіць на спектаклі школьнага драмкружка?
МГ belsat.eu