Беларуская каманда «МАЗ-СПОРТаўта» не зможа прыняць удзел у ралі-марафоне «Дакар» 2022 года праз санкцыі, пад якія патрапіў Менскі аўтамабільны завод, паведамляе выданне «Чэмпіянат».
Арганізатары ралі-марафона «Дакар» пацвердзілі, што былі вымушаныя скрэсліць з ліку ўдзельнікаў марафону ў 2022 годзе экіпажы «МАЗ» праз санкцыі краінаў ЕЗ. Раней тры экіпажы «МАЗ-СПОРТаўта» былі ў папярэднім спісе ўдзельнікаў грузавога заліку, але пазней зніклі, што стала нечаканасцю для самой беларускай каманды.
«З прычыны захадаў, прынятых Еўрапейскім звязам і якія закранаюць розныя беларускія юрыдычныя асобы, у тым ліку аўтавытворцы «МАЗ», французскія ўлады праінфармавалі арганізатараў «Дакара», што для «МАЗ» юрыдычна немагчыма прыняць удзел у гонцы 2022 года. Арганізатары «Дакара» былі вымушаныя праінфармаваць «МАЗ» пра гэта», – паведамляюць арганізатары ралі.
АЯ belsat.eu
