Міністр інфармацыі Уладзімір Пярцоў падпісаў загад аб ануляванні пасведчання друкаванага СМІ «Intex-press», паведамляе БАЖ. Такі загад міністр падпісаў яшчэ 30 чэрвеня.
У Баранавічах улады ліквідавалі недзяржаўнае выданне «Intex-press». Пра гэта стала вядома толькі цяпер, але загад аб ануляванні пасведчання друкаванага СМІ міністр інфармацыі Уладзімір Пярцоў падпісаў яшчэ 30 чэрвеня сёлета. У дакуменце паведамляецца, што газета не выходзіць шэсць месяцаў запар. У сувязі з гэтым і анулюецца пасведчанне, а таксама выданне выключылі з Дзяржаўнага рэестру сродкаў масавай інфармацыі.
Газета «Intex-press» перастала выходзіць з траўня 2021 года, бо яе адмовіліся прымаць у друкарнях.
«Паўсюль атрымалі адмовы. Нават у адной з друкарняў у Расеі нас назвалі «нядобранадзейнымі». А шмат якія іншыя друкарні адмаўляліся без тлумачэнняў – праз пэўны час. Магчыма, вывучалі нашае дасье праз інтэрнэт, альбо проста тэлефанавалі ў друкарню, з якой мы супрацоўнічалі раней», – кажа галоўны рэдактар выдання Уладзімір Янукевіч.
Выданне працягвала выходзіць у электронным варыянце. Але ў канцы 2021 года Міністэрства інфармацыі абмежавала доступ да сайту «Intex-press».
Алена Аляксандрава belsat.eu
