Ціханоўскую і Навальнага назвалі асноўнымі прэтэндэнтамі на Нобэлеўскую прэмію міру
Лідарка дэмакратычнай Беларусі Святлана Ціханоўская і расейскі апазіцыйны палітык Аляксей Навальны ўзначалілі шорт-ліст Нобэлеўскай прэміі міру 2022 года. Пра гэта аб’явіў нарвежскі Інстытут даследавання праблемаў міру.
На сайце нарвежскага Інстытуту даследавання праблемаў міру гаворыцца, што і Святлана Ціханоўская, і Аляксей Навальны жорстка крытыкуюць расейскае ўварванне ва Украіну.
«Нобэлеўская прэмія міру для іх будзе разглядацца як выразны выступ супраць расейскай агрэсіі і суагрэсіі Беларусі, а таксама як падтрыманне дэмакратычных і негвалтоўных альтэрнатываў Лукашэнку і Пуціну», – гаворыцца ў заяве.
Святлана Ціханоўская названая важнай асобай у мірным супрацьстаянні з рэжымам Лукашэнкі.
«Яна заклікала да справядлівых выбараў і спынення гвалту супраць дэманстрантаў, выступала за дэмакратычны і мірны пераход улады. Ціханоўская заслугоўвае прэміі за прасоўванне дэмакратычнай Беларусі», – падкрэсліваецца ў паведамленні.
Аляксей Навальны цяпер адбывае ў калоніі 9-гадовы тэрмін паводле абвінавачвання ў асабліва буйным махлярстве і ў непавазе да суда.
Лаўрэата Нобэлеўскай прэміі міру абвесцяць 7 кастрычніка. Летась гэтую ўзнагароду атрымаў галоўны рэдактар расейскай «Новай газеты» Дзмітрый Муратаў і філіпінская журналістка Марыя Рэса.
Сяргей Крот belsat.eu
