Грузія можа разгледзець разрыў дыпламатычных зносінаў з Беларуссю пасля візіту Лукашэнкі ў Абхазію
Пра магчымы разрыў дыпламатычных зносінаў з Беларуссю пасля паездкі Аляксандра Лукашэнкі ў самаабвешчаную Абхазію заявіў прадстаўнік парламенцкага камітэту па знешніх сувязях Нікалоз Самхарадзэ, паведамляе інфармацыйны партал «Новости – Грузия».
Паводле Самхарадзэ, візіт Лукашэнкі ў Абхазію – гэта несяброўскі жэст з боку кіраўніка Беларусі і грубае парушэнне тэрытарыяльнай цэласнасці і суверэнітэту Грузіі.
«Такія крокі падрываюць суверэнітэт краіны і асноўныя прынцыпы міжнароднага права, а таксама дыпламатычныя зносіны паміж Грузіяй і Беларуссю. Паўтарэнне падобнага кроку ў будучыні можа прывесці да разрыву зносінаў паміж дзвюма краінамі. Мы нікому не дазволім нанесці шкоду тэрытарыяльнай цэласнасці і суверэнітэту нашай краіны», – заявіў грузінскі чыноўнік.
Аб пагаршэнні адносінаў з Беларуссю папярэдзіў таксама спікер Парламенту Грузіі Шалва Папуашвілі:
«Беларусь ушчыльную падышла да чырвонай лініі адносінаў з Грузіяй», – сказаў палітык.
Пасля паездкі Лукашэнкі ў Піцунду у МЗС Грузіі быў выкліканы амбасадар Беларусі ў Грузіі Анатоль Ліс.
Візіт Лукашэнкі асудзілі прэзідэнтка, прэм’ер і спікер парламенту Грузіі. Яны назвалі яго парушэннем міжнароднага права і двухбаковых стасункаў. Кіраўнік парламенту Шалва Папуашвілі пры гэтым выказаў спадзяванне, што Беларусь вернецца да прынцыпаў, прызнаных міжнародным права «і ў рамках гэтага вызначэння мы ўбачым, што, асабліва ў дачыненні палітыкі непрызнання, ніякіх крокаў прадпрымацца не будзе».
28 верасня Лукашэнка без узгаднення з Тбілісі паехаў у самаабвешчаную Абхазію ў курортны горад Піцунда, дзе сустрэўся з кіраўніком самаабвешчанай рэспублікі Асланам Бжаніа. Паводле Лукашэнкі, на сустрэчы абмяркоўваліся гандлёва-эканамічныя сувязі. Да гэтага, 26 верасня, Лукашэнка сустракаўся з Пуціным.
Грузія лічыць Абхазію сваёй тэрыторыяй, акупаванай Расеяй. Незалежнасць Абхазіі прызналі Расея, Нікарагуа, Венесуэла, Науру, Сірыя.
Марыя Міхалевіч belsat.eu
