У жніўні 2021 года колькасць асобаў, якія атрымліваюць пенсію, склала 2 мільёны 425 тысячаў чалавек. Так мала пенсіянераў у Беларусі яшчэ не было. Адною з прычынаў такога змяншэння можа быць пандэмія каронавіруса, піша партал infobank.by.
Скарачэнне колькасці атрымальнікаў пенсіяў ідзе ўжо пяты год. За гэты час пенсіянераў у Беларусі стала менш на 194 тысячы чалавек. Найбольш пенсіянераў у нашай краіне было ў 2016 годзе – 2 мільёны 619 тысяч асобаў. А потым пачаўся спад.
Апошнім часам спад паскорыўся і такім хуткім яшчэ не быў за ўсю гісторыю незалежнай Беларусі. Найбольшае змяншэнне назіралі сёлета: з траўня да жніўня 2021 года пенсіянераў у нашай краіне стала менш на 29 тысячаў 200 чалавек.
Сярод прычынаў скарачэння колькасці пенсіянераў у Беларусі:
– павышэнне пенсійнага ўзросту,
– агульнае пагаршэнне дэмаграфічнай сітуацыі,
– пандэмія каронавіруса, падчас якой вырасла смяротнасць беларусаў.
Дзяржаве такое змяншэнне колькасці атрымальнікаў пенсіяў ашчаджае амаль 100 мільёнаў рублёў за месяц, згодна з падлікамі infobank.by.
Адначасова адсоткавая доля пенсіянераў у агульнай колькасці насельніцтва ў Беларусі не мінімальная: на сёння яна складае 26 %, гэта на ўзроўні 2010 года.
Мінімуму ў адсоткавым суаднясенні не назіраюць з дзвюх прычынаў:
– старэнне насельніцтва (сярэдні ўзрост беларусаў у 2021-м – 41 год, у 2000-м – 39 гадоў),
– скарачэнне агульнай колькасці насельніцтва.
ГГ, belsat.eu
