Прэзідэнт Польшчы Анджэй Дуда падпісаў запыт аб працягненні надзвычайнага становішча на мяжы з Беларуссю і накіраваў яго ў Сейм, які мае даць згоду.
Надзвычайнае становішча на польска-беларускай мяжы на тэрыторыі Люблінскага і Падляскага ваяводстваў увялі 3 верасня на 30 дзён у сувязі са значным павелічэннем спробаў незаконна мінуць мяжу з боку Беларусі.
«Мы маем справу са сталаю пагрозаю для грамадзянаў і грамадскага парадку на памежных тэрыторыях. Звесткі апошніх дзён паказваюць, што мы павінны наўпрост казаць пра эскалацыю міграцыйнага ціску на мяжу, – перадае польскі партал TVN24 словы кіраўніка Бюро нацыянальнай бяспекі Польшчы Паўла Солёха. – Новым элементам ёсць таксама небяспечныя, правакацыйныя паводзіны беларускіх сілавікоў у дачыненні польскіх салдатаў і афіцэраў».
Солёх падкрэсліў: згодна з ацэнкамі Бюро нацыянальнай бяспекі, назіраецца доўгатэрміновае пагаршэнне сітуацыі з бяспекаю на ўсёй мяжы Еўразвязу і Беларусі.
«Гэта новая рэчаіснасць, на якую памежныя дзяржавы і Еўразвяз будуць вымушаныя адказваць», – сказаў Павэл Солёх.
Надзвычайнае становішча Польшча ўвяла 3 верасня ў прымежнай зоне шырынёю 3 км, што закранула 115 паселішчаў у Падляскім ваяводстве і 68 – у Люблінскім. Сярод іншага, яно азначае забарону на правядзенне масавых і забаўляльных імпрэзаў, дзяжурства паліцыі ва ўзмоцненым рэжыме, правяранне дакументаў. На названай тэрыторыі не могуць быць асобы, якія там не жывуць, не працуюць ці не вучацца.
ГГ, belsat.eu