Стэнды з тэкстамі і здымкамі пра асноўныя падзеі апошняга года ў Беларусі можна ўбачыць на цэнтральнай плошчы Кіева – Майдане незалежнасці.
Выстава створаная ініцыятываю дапамогі беларусам ва Украіне «Free Belarus Center» пры падтрыманні ўкраінскага Музею Рэвалюцыі годнасці. Адкрылася яна яшчэ 12 жніўня. Але праз рыхтаванне да 30-годдзя аднаўлення незалежнасці Украіны доступ да яе быў часова абмежаваны. Цяпер выставу можа ўбачыць кожны. Працуе яна да 30 верасня ўключна.
Экспазіцыя складаецца з 17 стэндаў з тэкстамі і фота, прысвечанымі асноўным падзеям беларускага пратэсту. Кожны распавядае асобную гісторыю: пра валанцёрскую барацьбу з COVID-19, скрадзеныя выбары, гвалт і катаванні, жанчын рэвалюцыі, ліквідацыю медыяў, культурніцкі пратэст, эміграцыю, нацыянальную ідэнтычнасць ды іншыя важныя падзеі пратэставага года.
На выставе прэзентаваныя працы пяці фатографаў з Беларусі і Польшчы.
Для тых, хто не ў Кіеве, «Free Belarus Center» стварыў і онлайн-версію выставы на ўкраінскай і англійскай мовах.
ГГ, belsat.eu