Міністэрства юстыцыі пазбавіла Алега Агеева адвакацкай ліцэнзіі яшчэ ў 2011 годзе, пасля таго, як Агееў, які быў адвакатам Алеся Міхалевіча, кандыдата на прэзідэнцтва на выбарах 2010 года, распавёў пра ўмовы ўтрымання свайго падабароннага ў СІЗА КДБ. Цяпер Камітэт правоў чалавека запатрабаваў вярнуць Агееву ліцэнзію, паведамляе Беларуская асацыяцыя журналістаў.
Камітэт правоў чалавека ААН апублікаваў свае высновы пасля разгляду скаргі Алега Агеева.
Алесь Міхалевіч быў арыштаваны на наступны дзень пасля выбараў у снежні 2010 года супрацоўнікамі КДБ і абвінавачаны ў арганізацыі масавых закалотаў. Пасля вызвалення экс-кандыдат на прэзідэнцтва заявіў пра катаванні ў ізалятары КДБ і што ён быў змушаны падпісаць дакумент аб супрацы ў абмен на сваё вызваленне. Таксама ў няволі палітык быў пазбаўлены магчымасці скарыстацца медычнай і прававой дапамогай.
Алег Агееў, цяперашні намеснік старшыні Беларускай асацыяцыі журналістаў, а тады адвакат Міхалевіча, распавёў пра гэтыя дэталі журналістам. У выніку Міністэрства юстыцыі распачало расследаванне ў дачыненні Агеева за перавышэнне паўнамоцтваў адваката і парушэнне прафесійнай этыкі.
14 лютага 2011 года Агеева пазбавілі адвакацкай ліцэнзіі з фармулёўкай «здзейсніў учынак, не сумяшчальны са званнем адваката».
Пасля шэрагу безвыніковых апеляцыйных скаргаў у беларускія інстанцыі Агееў звярнуўся ў Камітэт правоў чалавека ААН.
«Відавочна, што спадар Агееў быў падвергнуты жорсткім і несправядлівым санкцыям толькі за тое, што ён выступіў у СМІ, а зрабіў ён гэта ў інтарэсах свайго кліента і для задавальнення грамадскіх інтарэсаў, – заявіў Арыф Булкан, сябра Камітэту правоў чалавека. – Права на свабоду выказвання меркавання гарантуецца Міжнародным пактам аб грамадзянскіх і палітычных правах, і сітуацыя спадара Агеева не падпадае пад магчымыя выключныя абмежаванні гэтага права».
Камітэт правоў чалавека ААН заклікаў Беларусь выплаціць Агееву адэкватную кампенсацыю і аднавіць ягоную адвакацкую ліцэнзію, а таксама не дапускаць падобных парушэнняў у будучыні.
Алег Агееў, каментуючы рашэнне Камітэту правоў чалавека ААН, звярнуў увагу на тое, што хоць улады Беларусі і сцвярджаюць, быццам рашэнні гэтага міжнароднага органу носяць рэкамендацыйны характар, і адмаўляюцца іх выконваць, усё ж такі іх выкананне – абавязак дзяржаваў – сябраў ААН. Пазіцыя Беларусі ў гэтым выпадку не адпавядае нормам міжнароднага права, а менавіта – арт. 2 Міжнароднага пакту аб грамадзянскіх і палітычных правах.
ГГ, belsat.eu