Суд Заводскога раёну Менску 30 чэрвеня абвесціў прысуд 34-гадовай Вользе Сінялёвай, якая вырашыла разарваць дамову арэнды на кватэру з памочніцай пракурора Алінай Касьянчык.
Аліна Касьянчык з ліпеня 2020 года здымала ў Вольгі кватэру. У пэўны момант гаспадыня прапанавала памочніцы пракурора з’ехаць. Касьянчык пагадзілася і знайшла іншае жытло. А пасля гэтага супраць Сінялёвай завялі крымінальную справу паводле арт. 190 Крымінальнага кодэксу Беларусі – «Парушэнне раўнапраўя грамадзянаў».
Паводле Генпракуратуры, «абвінавачаная паддалася інфармацыйнаму ўздзеянню Telegram-каналаў і іншых інтэрнэт-рэсурсаў, у якіх размяшчаліся заклікі да ўшчамлення правоў пракурорскіх работнікаў, якія ажыццяўляюць крымінальны пераслед і падтрымліваюць ад імя дзяржавы абвінавачанне ў судзе ў крымінальных справах аб удзеле грамадзянаў у пратэставых акцыях».
На думку ведамства, гэтак мянчанка парушыла правы, свабоды і законныя інтарэсы пацярпелай выключна ў сувязі з займанай ёю пасадай і запатрабавала ад яе ў аднабаковым парадку вызваліць жылое памяшканне.
Суд праходзіў у закрытым рэжыме. Першае паседжанне было прыпыненае, бо высветлілася, што адвакат Вольгі Андрэй Мачалоў пазбаўлены ліцэнзіі.
30 чэрвеня суддзя Анжэла Касцюкевіч пакарала гаспадыню кватэру 2 гадамі абмежавання волі без накіравання ў папраўчую ўстанову – гэтак званая «хатняя хімія».
Вользе Сінялёвай 34 гады, яна выхоўвае дваіх дзяцей, цяпер яна ў дэкрэтным адпачынку.
Памочніца пракурора Аліна Касьянчык вядомая ўдзелам у палітычных працэсах. Яна выступала як дзяржаўная абвінаваўца ў справе журналістак «Белсату» Кацярыны Андрэевай і Дар’і Чульцовай, у справе аб надпісах «Не забудзем» каля месца гібелі Аляксандра Тарайкоўскага і іншых.
ГГ, belsat.eu