Былыя следчыя зладзілі чарговае расследаванне звестак пра асобаў, якія падазраюцца ў злачынствах супраць грамадзянаў Беларусі. Гэтым разам ініцыятыва «BYPOL» высветліла некаторыя моманты з біяграфіі суддзі Вікторыі Шабуні, якая лідаруе ў колькасці палітычна матываваных прысудаў.
Вікторыя Шабуня нарадзілася ва Украіне, у Нікалаеве, і да гэтага часу трымае сувязь з роднымі, якія засталіся ў гэтым горадзе.
Будучая суддзя скончыла Нікалаеўскі політэхнічны тэхнікум паводле спецыяльнасці тэхнік-судамеханік. Але паводле спецыяльнасці яна не працавала. За тры гады змяніла пяць працоўных месцаў. Была кухаркаю, загадчыцай крамы, сакратаркай, бухгалтаркай. У 1996 годзе яна выйшла замуж за беларуса і пераехала ў Менск. Да 2004 года Шабуня працавала на розных пасадах у камерцыйных арганізацыях. Адметна, звяртаюць увагу следчыя з «BYPOL», што ўсе гэтыя арганізацыі цяпер ліквідаваныя.
Але ў гэты час Вікторыя Шабуня адвучылася завочна ў менскім Інстытуце кіравання. Вучоба заняла шэсць гадоў.
У 2004 годзе Шабуня ўладкавалася судовай выканаўцай у суд Фрунзенскага раёну Менску.
«Упершыню Вікторыя Шабуня затрымалася на адной працы ажно на доўгія шэсць гадоў».
У 2010 годзе Шабуня зрабілася суддзёй. Яна, паводле інфармацыі рэсурсу «Zubr», стала абсалютным лідарам сярод сваіх калегаў у колькасці вынесеных палітычных прысудаў. Агулам Шабуня вынесла 382 палітычныя рашэнні ў крымінальных і адміністратыўных справах. Прысудзіла 99 087,5 рублёў штрафаў і 1847 содняў адміністратыўнага арышту.
Яна судзіла Ніну Багінскую, Паўла Севярынца, Змітра Дашкевіча і шмат каго яшчэ.
Следчыя таксама звяртаюць увагу на тое, што Вікторыя Шабуня жыве ў Менску ў арэнднай кватэры.
«Вікторыя Валер’еўна настолькі не звязвае сваю будучыню з Беларуссю, што за дзесяць гадоў службы суддзёй не пажадала абцяжарваць сябе асабістым жытлом у нашай краіне. Хоць і мела дзеля гэтага ўсе магчымасці, з улікам тых ільготаў, якія даюцца суддзям для будавання асабістага жытла, а таксама з увагі на ўзровень іхных заробкаў», – адзначаюць следчыя з «BYPOL».
СК belsat.eu