Ва Украіне паранены беларускі добраахвотнік і лідар «Маладога фронту» Дзяніс Урбановіч
Беларускі добраахвотнік і старшыня «Маладога фронту» Дзяніс Урбановіч паранены ва Украіне і зараз знаходзіцца ў шпіталі з кантузіяй, паведаміла беларуская журналістка Любоў Лунёва.
Двое содняў ён быў без прытомнасці.
Па словах Лунёвай, у Дзяніса ногі і рукі цэлыя, аднак знікла чутка. Беларускі добраахвотнік атрымаў раненне пасля таго, як побач узарвалася міна. Яшчэ трое вайскоўцаў таксама параненыя.
У Беларусі актывіст Дзяніс Урбановіч прымаў актыўны ўдзел у абароне Курапатаў, адсядзеў 2 гады за акцыю, якую ён з малодшым братам зладзіў на выбарчым участку падчас прэзідэнцкай кампаніі 2015 года.
Пасля прэзідэнцкіх выбараў у 2020 годзе Урбановіча некалькі разоў затрымлівалі па адміністратыўных артыкулах, ён зазнаваў незаконны пераслед, рэпрэсіі і катаванні.
У снежні 2021 года ён пад пагрозай крымінальнай справы, якую на яго завялі па артыкуле 342 Крымінальнага кодэксу (арганізацыя або ўдзел у дзеяннях, якія груба парушаюць грамадскі парадак) выехаў ва Украіну.
З пачатку расейскага ўварвання ва Украіну Дзяніс Урбановіч запісаўся добраахвотнікам ва ўкраінскае войска.
Алена Рувіна belsat.eu
