Оляф Шольц выказаўся пра хаду поўнамаштабнай вайны ва Украіне. Канцлер Нямеччыны заявіў падчас тэлемарафону «Save Ukraine» пра падтрыманне ўкраінскага народу і раскрыў планы пасляваеннага аднаўлення Украіны.
«Мы разам з вамі думкамі і сэрцам. Пуцін не пераможа. Мы разам з вамі, мы аб’яднаныя. Мы будуем планы пасляваеннага аднаўлення Украіны», – сказаў Шольц.
Канцлер Нямеччыны заявіў, што ягоная краіна штодня падтрымлівае Украіну з таго моманту, як Расея здзейсніла вайсковае ўварванне. Асаблівую ўвагу ён звярнуў на фінансавую дапамогу, каб не абрынулася ўкраінская эканоміка.
«Нямеччына разам з сябрамі і партнёрамі дапамагае, каб украінская эканоміка не зазнала вялікага падзення», – заявіў Шольц.
Таксама канцлер падкрэсліў, што Нямеччына гасцінна прыняла амаль 800 тысячаў уцекачоў з Украіны. Нагадаем, што Нямеччына найбліжэйшым часам вылучыць Украіне 1 мільярд еўраў.
Раман Лугоўскі belsat.eu