Вынікі пошуку для:

Кавалеўскі: Офіс Ціханоўскай у Кіеве выконвае заўважную функцыю прадстаўніцтва Беларусі ва Украіне

Валер Кавалеўскі распавёў у эфіры «Белсату», чым займаецца адкрытае нядаўна прадстаўніцтва Офісу Святланы Ціханоўскай у Кіеве. Дыпламат заявіў, што ініцыятыва адыгрывае важную і прадстаўнічую функцыю і ёсць адзіным прадстаўніцтвам Беларусі ў Кіеве, бо з пачатку вайны прадстаўнікі лукашэнкаўскай амбасады выехалі.

Валер Кавалеўскі. Фота: Telegram / CabinetST

Кавалеўскі адзначыў, што галоўная мэта офісу – паказаць, што сапраўдная Беларусь – з Украінай. Апроч таго, офіс абараняе інтарэсы беларусаў, якія засталіся ва Украіне, бо існуюць праблемы з банкаўскімі карткамі, стаўленнем, беларускаю тапанімікаю, міграцыйнымі пытаннямі.

«Мы працуем над тым, каб менш беларускага не станавілася. Імкнемся выбудоўваць дачыненні паміж Украінай і сапраўднаю Беларуссю. З Офісам прэзідэнта, Вярхоўнаю Радаю. Спадзяюся, заканадаўчы орган стане голасам падтрымкі дэмакратычнай Беларусі. Мы імкнемся даносіць інфармацыю, што беларусы падтрымліваюць Украіну, нягледзячы на тое, што фактычна апынуліся ў турме ў сваёй уласнай краіне», – заявіў Кавалеўскі.

Палітык спадзяецца, што дзейнасць Офісу ў Кіеве паўплывае на тое, каб прагматычныя інтарэсы Украіны не задавалі тону ў дачыненнях Беларусі і Украіны. Кавалеўскі згадаў, што такая палітыка гандлю перад вайною шмат у чым дапамагла Лукашэнку застацца на сваёй пазіцыі.

«Гэта не проста полк…» Беларускі баец Дзяніс Кіт расказаў, чаму легендарны «Азоў» немагчыма перамагчы

Дыпламат дадаў, што каманда Офісу будзе ажыццяўляць сувязі не толькі з урадам краіны, але і з беларускімі добраахвотнікамі:

«Было шмат сустрэчаў з кіраўніцтвам палка Каліноўскага і полкам «Пагоня». Мы добра выслухалі крытыку і імкнемся выбудаваць палітыку Офісу Ціханоўскай з улікам усіх меркаванняў. Мы ўсе хочам пераменаў, гэта нас яднае. Мы таксама хочам ведаць, чым можам дапамагчы цяпер».

Апроч іншага, Кавалеўскі згадаў пытанне заблакаваных рахункаў і банкаўскіх картак:

«Праблема для беларусаў больш сур’ёзная. У першыя дні вайны Нацыянальны банк пастанавіў замарозіць беларускія рахункі. Трэба дамагчыся скасавання гэтай пастановы для беларусаў, якія жывуць і засталіся ва Украіне, для бізнесаў нашых грамадзянаў».

Беларусам ва Украіне заблакавалі банкаўскія карты. Што можна зрабіць?

Офіс Ціханоўскай у Кіеве працягвае збіраць звесткі пра беларусаў, якія падаюць запыты на размарожванне рахункаў, верыфікуе іх, каб перадаць звесткі адразу ў банкі.

«Мы стараемся выбудаваць стасункі з дыяспараю ва Украіне. Значная частка выехала, але тыя, хто застаўся, вельмі актыўныя. Там важна працаваць, каб дапамагчы Украіне і адстаяць беларускія інтарэсы», – дадаў Кавалеўскі.

Раман Лугоўскі belsat.eu

Падпісвайся на telegram Белсату

Hавiны