30 красавіка ў Беларусі – гэта не толькі заканчэнне другога месяца вясны, але і 265-ы дзень пратэсту супраць фальсіфікацыі прэзідэнцкіх выбараў і гвалту сілавікоў.
Пакуль Святлана Ціханоўская наведвае з працоўнымі візітамі Аўстрыю ды Італію, ужо з’яўляюцца першыя вынікі ейных паездак. Гэтак, канцлер Аўстрыі Зэбаст’ян Курц патэлефанаваў прэзідэнту Расеі Уладзіміру Пуціну ды абмеркаваў з ім Беларусь. Расейскі бок падкрэсліў «непрымальнасць умяшання звонку ва ўнутраныя справы гэтай краіны» – Беларусі.
Між тым еўрадэпутаты дадалі ў рэзалюцыю адносна Расеі пункты, якія датычаць сітуацыі ў Беларусі. Еўрапейскі парламент асуджае падтрымку Крамлём недэмакратычнага рэпрэсіўнага рэжыму ў Сірыі, Беларусі, глыбока занепакоены палітычнымі арыштамі беларусаў у Расеі і іх наступнай выдачай Беларусі.
Таксама Еўрапарламент асабліва занепакоены тым, што Расея падтрымлівае мэтанакіраванае пераслед арганізацыяў нацыянальных меншасцяў у Беларусі, уключаючы Саюз палякаў у Беларусі.
Дзейныя ўлады ж працягваюць рэпрэсаваць уласных грамадзянаў. Гэтак, у Менску асудзілі Уладзіміра Жыхара, які нібыта паралізаваў рух транспарту ў Менску і пабіў восем амапаўцаў. Яму далі 5 гадоў зняволення.
У Пінску суд вынес прысуд 14-і фігурантам пратэстаў у ноч на 10 жніўня. За тое, што міліцыянты «перажылі страх, прыніжэнне, боль і сорам, страцілі сон, спакой і апетыт, адчувалі і адчуваюць трывогу», пратэстоўцы атрымалі ад 5,5 да 6,5 гадоў зняволення.
За подпісы за альтэрнатыўных кандыдатаў звальняюць славутых лекараў, пачынаюць справы за пераробленую фразу з афіцыйнага гімна і абвяшчаюць у вышук удзельнікаў прарывы 150-і джыпаў.
Тым не менш, нават у гэтай сітуацыі ўлады вымушаныя ісці на саступкі, хай і не ў дачыненні да палітычных апанентаў. Сёння стала вядома, што былі памілаваныя браты Ілля і Станіслаў Косцевы, якіх у 2020 годзе за забойства настаўніцы прысудзілі да расстрэлу. Гэта другі такі выпадак у гісторыі незалежнай Беларусі. Раней наяўнасць смяротнага пакарання ў краіне неаднаразова крытыкавалі Еўразвяз і міжнародныя праваабарончыя арганізацыі.
Нягледзячы на ўсе рэпрэсіі, беларусы працягваюць выходзіць на акцыі пратэсту рознага фармату. У тым ліку і на маршы.
МГ belsat.eu