Еўрадэпутаты дадалі ў рэзалюцыю адносна Расеі пункты, якія датычаць сітуацыі ў Беларусі. Самая рэзалюцыя была прынятая 28 красавіка.
Паводле папраўкі, унесенай у рэзалюцыю, Еўрапейскі парламент асуджае падтрымку Крамлём недэмакратычных рэпрэсіўных рэжымаў у Іране, Паўночнай Карэі, Венесуэле, Сірыі, Беларусі, глыбока занепакоены палітычнымі арыштамі беларусаў у Расеі і іх наступнай выдачай Беларусі.
Еўрапарламент асабліва занепакоены тым, што Расея падтрымлівае мэтанакіраванае пераслед арганізацыяў нацыянальных меншасцяў у Беларусі, уключаючы Саюз палякаў у Беларусі.
28 красавіка дэпутаты Еўрапарламенту прагаласавалі за рэзалюцыю з заклікам адключыць Расею ад міжбанкаўскай сістэмы перадачы інфармацыі пра плацяжы «SWIFT» і спыніць будаванне «Паўночнага патоку-2». Захады ціску на Маскву прапануюцца прыняць у выпадку, калі яна ўварвецца ва Украіну.
Аўтары праекту таксама заклікаюць адмовіцца ад імпарту нафты і газу з Расеі, замарозіць еўрапейскія актывы «алігархаў, блізкіх да расейскіх уладаў», і ануляваць іх візы.
Рэзалюцыя прынятая ў адказ на сітуацыю з апазіцыянерам Аляксеем Навальным, сцягванне расейскіх войскаў да мяжы з Украінай і «расейскія атакі» на Чэхію.
МГ belsat.eu
