«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі на вечар 30 сакавіка чытайце ў нашым аглядзе.
Агенцтва ААН па справах бежанцаў паведаміла, што з пачатку вайны ва Украіне колькасць бежанцаў, якія пакінулі краіну, перавысіла 4 мільёны чалавек. Паводле інфармацыі на 29 сакавіка, большасць бежанцаў перасеклі мяжу з Польшчай – 2 336 799 чалавек.
У выніку расейскай агрэсіі ва Украіне загінулі 145 дзяцей, яшчэ 222 атрымалі раненні. Гэтыя лічбы не дакладныя, бо пакуль няма магчымасці абследаваць месцы абстрэлаў у раёнах актыўных баявых дзеянняў.
Паводле Генштабу Збройных сілаў Украіны, па стане на раніцу 30 сакавіка страты расейскіх войскаў складаюць каля 17300 чалавек асабовага складу. Разам з тым намесніца дзяржсакратара ЗША Вікторыя Нуланд заявіла, што, па іхных ацэнках, расейскі бок страціў больш за 10 тысяч чалавек.
Таксама ў Генштабе ЗСУ паведамілі, расейскія войскі цяпер ажыццяўляюць перагрупоўку і збіраюць сілы для правядзення наступальнай аперацыі ва Усходняй аперацыйнай зоне. У гэты ж час Расея перакінула ва Украіну каля 2000 вайскоўцаў з акупаваных тэрыторыяў Грузіі.
Разам з тым дарадца Офісу прэзідэнта Украіны Аляксей Арастовіч выказаў меркаванне, што верагоднасць далучэння Беларусі на баку расейскай агрэсіі супраць Украіны з’яўляецца невысокай. Паводле Арастовіча, гэта цяпер зразумелі і ў Расеі.
Віцэ прэм’ер-міністр па пытаннях рэінтэграцыі часова акупаваных тэрыторыяў Украіны Ірына Верашчук заклікала Раду бяспекі ААН павінна прыняць меры па дэмілітарызацыі Зоны адчужэння ЧАЭС і ўвядзенні туды спецыяльнай місіі ААН.
Прэс-сакратар прэзідэнта РФ Дзмітрый Пяскоў пракаментаваў прапанову ўкраінскай дэлегацыі зафіксаваць пазіцыі Масквы і Кіева па Крыме на 15 год у будучай дамове пра спыненне вайны ва Украіне. Паводле Пяскова, Крэмль лічыць Крым часткай Расеі, а Канстытуцыя РФ забараняе любыя перамовы пра статус анексаванай тэрыторыі.
Упаўнаважаная Вярхоўнай Рады Украіны ў правах чалавека Людміла Дэнісава паведаміла, што з радзільні ў Марыупалі расейскія вайскоўцы прымусова вывезлі ў РФ і на часова акупаваныя тэрыторыі пацыентак і медыкаў. Агулам вывезена больш за 70 чалавек. Нагадаем, што гвалтоўнае перамяшчэнне насельніцтва належыць да злачынстваў супраць чалавечнасці і не мае тэрміну даўніны.
Пачаў фармавацца Беларускі полк «Пагоня» у складзе Інтэрнацыянальнага легіёна Узброеных сілаў Украіны. Адзначаецца, што полк створаны з ініцыятывы беларускіх афіцэраў пры падтрымцы ЗСУ для абароны незалежнасці і тэрытарыяльнай цэласнасці Украіны, а таксама з мэтай стварэння асновы для новай прафесійнай беларускай арміі. У полк запрашаюцца псіхалагічна ўстойлівыя мужчыны ва ўзросце ад 20 да 40 гадоў, якія маюць досвед вайсковай службы. Таксама разглядаюцца кандыдаты з добрым узроўнем фізічнай падрыхтоўкі, дзейныя ці былыя спартоўцы.
ВК belsat.eu