Дэлегацыі Беларусі і Расеі папрасілі не прыязджаць на цырымонію да гадавіны вызвалення Бухэнвальду
У памяць па ахвярах нацысцкага тэрору штогод 11 красавіка адзначаецца Дзень вызваленне нацысцкіх лагераў. На цырымоніі запрашаюць дыпламатаў розных краін. Аднак сёлета афіцыйныя дэлегацыі Расеі і Беларусі папрасілі не прыязджаць на памятныя дзеі, прысвечаныя вызваленню канцлагераў Бухэнвальд і Дора (Нямеччына), якія пройдуць 10 красавіка, паведаміў арганізатар цырымоніі.
Прычынай стала гібель украінскага вязня Бухэнвальду, 96-гадовага Барыса Раманчанкі, які загінуў у выніку абстрэлу расейскімі войскамі Харкава 21 сакавіка. Ён быў віцэ-прэзідэнтам Міжнароднага камітэту Бухэнвальд – Дора.
«Пасля гвалтоўнай смерці былога вязня Бухэнвальду Барыса Раманчанкі падчас нападу Расеі на Харкаў прысутнасць афіцыйных прадстаўнікоў урадаў Расеі і Беларусі на ўшанаванні 77-й гадавіны вызвалення была б невыноснай», – напісалі арганізатары цырымоніі.
Таксама арганізатары адзначылі, што адмена візіту дыпламатычных прадстаўнікоў Расеі і Беларусі была накіраваныя «не супраць дзвюх краін, а супраць двух урадаў, якія вядуць або падтрымліваюць агрэсіўную вайну, а таксама робяць жорсткія дзеянні супраць апазіцыі ў сваёй краіне».
Пры гэтым былых вязняў канцлагераў, якія жывуць на тэрыторыі былога СССР, гэтая забарона не датычыць.
АД belsat.eu
