Прэзідэнт Літвы Гітанас Наўседа вылучыў Святлану Ціханоўскую на Нобэлеўскую прэмію міру. Пра гэта паведамляе агенцтва BNS са спасылкай на ўласныя крыніцы.
Згодна з правіламі, кіраўнікі дзяржаваў маюць права вылучаць кандыдатаў на Нобэлеўскую прэмію міру. Падаваць заяўкі можна да 31 студзеня.
Афіцыйна гэтая інфармацыя пакуль не пацверджана. Прэс-служба прэзідэнта Літвы адмовілася каментаваць звесткі пра вылучэнне Святланы Ціханоўскай на Нобэлеўскую прэмію.
«Мы не каментуем інфармацыю аб Нобэлеўскай прэміі міру», – сказаў дарадца Наўседы Рыдас Ясюлёніс.
Нагадаем, у верасні 2020 года Гітанас Наўседа заявіў, што Літва гатовая ўзяць на сябе галоўную ролю і стаць пасярэднікам паміж удзельнікамі пратэстаў і ўладамі Беларусі. Паводле прэзідэнта, гэта абавязак Літвы як вольнай дзяржавы, якая пацярпела праз рэпрэсіўныя і акупацыйныя рэжымы. У пачатку студзеня Наўсёда заявіў, што Літва і ўвесь Еўразвяз падтрымліваюць барацьбу беларусаў за свабоду і дэмакратыю.
ІІ belsat.eu