Бліскучы белы гарадскі аўтамабіль едзе па эстонскай шашы, амаль не прыцягваючы ўвагі. Адзінае, што едзе ён толькі правым, павольным шэрагам. Гэта новае аўта ад Mitsubishi Corporation, якое здабывае папулярнасць у балтыйскай краіне, і завецца яно І-MiEV.
Эстонія імкнецца стаць самаю “зялёнаю” дзяржаваю да 2012 г. праз шырокае карыстанне электрамабілямі замест аўтаў на бензіне. Урад не думае спыняцца на першай партыі з 507 электрамабіляў і плануе працягнуць і павялічыць імпарт.
Талін прадаў 10 млн вугляродных крэдытаў для Mitsubishi Corporation у абмен на аўтамабілі. За рэшту грошай урад плануе стварыць простыя ў карыстанні пункты электрычнага ладавання для аўтамабіляў ва ўсёй краіне, а таксама схему субсідавання кіроўцаў, якія аддаюць перавагу электрычным аўтам перад “бензінавымі”.
Улады Эстоніі не ведаюць дакладна, якія будуць наступствы, але спадзяюцца, што распаўсюд электрамабіляў стане адным з крокаў да паляпшэння экалогіі. Плануецца забяспечыць больш як 200 эстонскіх муніцыпалітэтаў экалагічным і танным сродкам транспарту.
Дагэтуль стварыць рынку электрычных аўтаў не атрымалася, бо бензастанцыі не ставяць прыладаў для ладавання, а людзі не набываюць электрамабіляў, бо няма гэтых ладаванак. Таму электрамабіляў у краіне вельмі мала. Гэта падобна да пытання пра курыцу і яйка: што мусіць з’явіцца раней? Але сітуацыя можа змяніцца да лепшага: бензастанцыі гатовыя падтрымліваць электрамабілі, калі ўрад усталюе ладаванкі для іх за дзяржаўныя сродкі. Прадстаўнікі аўтастанцыяў бачаць ва ўрадавай ініцыятыве рух наперад.
Электрычны аўтамабіль з цалкам наладаваным акумулятарам можа праехаць прыкладна 150 км. У адпаведнасці з пагадненнем паміж Эстоніяй і Mitsubishi шырокую сетку хуткага ладавання сістэмы для электрычных аўтамабіляў створаць блізкім часам. Паўстане каля 250 месцаў, каб “падсілкаваць” аўта: на найбуйнейшых дарогах, у гарадах і вёсках. Батарэю можна наладаваць на 80 % за паўгадзіны.
Адлегласць паміж пунктамі ладавання не будзе перавышаць 100 км. Каб зрабіць выкарыстанне электрычных аўтамабіляў яшчэ больш экалагічным, электраэнергія, якая выкарыстоўваецца для падтрымання такіх аўтамабіляў, будзе вырабляцца з аднаўляльных крыніцаў энергіі.
Кошт электрычнага аўтамабіля па-ранейшаму адносна высокі – каля 35–38 тыс. еўраў. Нават калі штодзённыя выдаткі на эксплуатацыю ў дзесяць разоў меншыя ў параўнанні з аўтамі на бензіне, людзей дагэтуль не пераканалі плаціць так шмат за гэткі маленькі аўтамабіль.
Частка сродкаў ад дамовы паміж Эстоніяй і Mitsubishi пойдзе на субсідыі. Урад заявіў, што можа субсідаваць да 50 % ад кошту для першых 500 пакупнікоў электрамабіляў ад любых вытворцаў.
Спажыўцы не спяшаюцца перасаджвацца за стырно электрамабіляў, бо лічаць іх павольнымі ды нязручнымі з увагі на сталую патрэбу ладавання.
belsat.eu