Беларускія праваабаронцы працягваюць разглядаць крымінальныя справы на адпаведнасць адзначэнню «палітычны зняволены». Яны не заўсёды паспяваюць за рэпрэсіўным апаратам.
Праваабарончы цэнтр «Вясна» апублікаваў супольную заяву шасці праваабарончых установаў аб прызнанні палітычнымі зняволенымі яшчэ шасці чалавек.
Самы вядомы са спісу – Павел Белавус, заснавальнік крамы «Symbal.by» і сузаснавальнік «Арт-сядзібы», адзін з арганізатараў святкавання Дня Волі ў 2020, 2019 і 2018 гадах. Белавуса затрымалі 15 лістапада, асудзілі на адміністратыўны арышт за «дробнае хуліганства», але не вызвалілі, а распачалі крымінальную справу за нібыта «арганізацыю і падрыхтоўку дзеянняў, якія груба парушаюць грамадскі парадак».
Абноўлена. Паводле звестак праваабаронцаў «Вясны», 19 лістапада Белавуса судзілі за тое, што ён зладзіў «несанкцыянаваную акцыю» тым, што ягоную татуіроўку з бел-чырвона-белым сцягам без санкцыі Менгарвыканкаму пабачылі міліцыянты Ленінскага РУУС Менску.
Паводле той жа ч.1 арт.342 КК РБ у няволі прызнаныя цяпер палітвязнямі Мікалай Сяргеенка, Уладзімір Мельнік і Марына Неўдах. Таксама палітвязнямі прызнаныя Аляксандр Зялюткін, які ў няволі за «Масавыя беспарадкі» (ч.2 арт.293 КК РБ), і менскі бяздомнік Аляксандр Кутас, асуджаны за «Неаднаразовае парушэнне парадку правядзення масавых мерапрыемстваў» (арт.342-2 КК РБ). Кутас стаў першым асуджаным паводле такога артыкулу.
Праваабаронцы па-ранейшаму сцвярджаюць, што выступы грамадзянаў насілі стыхійны, самаарганізаваны характар і былі выкліканыя недаверам да вынікаў выбараў, не прызнаных міжнароднай супольнасцю дэмакратычнымі і справядлівымі. Сходы грамадзянаў насілі мірны характар і не ўяўлялі пагрозы ні нацыянальнай, ні грамадскай бяспецы. Нягледзячы на гэта, дэманстранты былі атакаваныя спецпадраздзяленнямі МУС з непрапарцыйным ужываннем гвалту, спецсродкаў і зброі.
Па-ранейшаму праваабаронцы патрабуюць неадкладна вызваліць усіх палітычных зняволеных (іх ужо 967), а таксама грамадзянаў, затрыманых у сувязі з рэалізацыяй свабоды мірных сходаў у поствыбарчы перыяд, і спыніць палітычныя рэпрэсіі.
АА belsat.eu