Расейскі палітолаг Андрэй Суздальцаў у эфіры студыі «Белсату» заявіў што транзіт улады ў Беларусі насамрэч ужо ідзе. Бо тое, што Лукашэнка заняўся пераўтварэннем Канстытуцыі, – і ёсць транзіт. «Лукашэнка шукае сховішча», – заявіў Суздальцаў, каментуючы вынікі сустрэчы Лукашэнкі з Пуціным 29 снежня ў Санкт-Пецярбурзе.
«Давайце разумець правільна: тое, што Лукашэнка заняўся канстытуцыйным пераўладкаваннем – гэта і ёсць транзіт. Калі б ён выйграў бы выбары з 81%, то навошта б яму патрэбна было гэта рабіць, гэтыя крыўлянні цэлы год. Ён іх не выйграў. Таму і гэтая мітусня. Ён шукае варыянты застацца, легітымізавацца… Але гэта недзеяздольная Канстытуцыя, яна не зможа працаваць. Лукашэнка шукае сховішча, то бок транзіт ідзе», – сказаў Андрэй Суздальцаў.
Суздальцаў не згадзіўся з меркаваннем палітолага Валерыя Карбалевіча, які лічыць, што, напэўна, Пуцін падчас сустрэчы з Лукашэнкам у Пецярбурзе згадзіўся падтрымаць канстытуцыйную рэформу ў Беларусі, каб Лукашэнка заставаўся на пасадзе як мінімум да 2025 году. Бо, маўляў, Лукашэнка патрэбны Пуціну ў супрацьстаянні Захаду.
На думку Андрэя Суздальцава, каб гэта было так, то Лукашэнку б далі ў Маскве грошы. Але грошы ён не атрымаў.
«Больш за тое, першасны запыт быў – 3,5 млрд долараў. Але не было нават пра гэта гаворкі. Масква патлумачыла, што і так дапамагае Беларусі… Усё. Грошай няма. Гэта першае.
А другое – у супрацьстаянні з Захадам Лукашэнка бескарысны. Ён не саюзнік… Яго выступы пра размяшчэнні ядравай зброі – усе выдатна разумеюць, што гэта немагчыма. Насамрэч Расеі патрэбны дыялог. І яна настойвае на перамовах з Захадам зараз. Ёсць нават кантрольная дата – 14 студзеня», – кажа Андрэй Суздальцаў.
Палітолаг не выключае, што Лукашэнка можа стаць у перамовах Расеі з Захадам разменнай манетай.
«Ён гэтага вельмі баяўся, калі была першая сустрэча з кіраўніком цяперашняй адміністрацыі ЗША Байдэнам 16 чэрвеня ў Жэневе. Ён сапраўды баяўся, што яго выкарыстаюць пры разліках. І такі варыянт нельга выключаць», – мяркуе Суздальцаў.
Эксперт заўважае, што на сённяшні дзень Расеі наагул няма за што дапамагаць Лукашэнку. Таму з Санкт-Пецярбургу той паляцеў з пустымі рукамі.
Цалкам размову з палітолагамі Валерыем Карбалевічам і Андрэем Суздальцавым глядзіце ў праграме «Студыя «Белсат».
ЗК belsat.eu