Пакуль сам «ByPol» не абвесціць павышанай ці поўнай ступені гатовасці, рассылаць інструкцыі плану «Перамога» ён не будзе.
Сітуацыйна-аналітычны цэнтр пры ініцыятыве былых беларускіх сілавікоў «ByPol» заўважыў рассылку фальшывых паведамленняў ад імя «ByPol» з інструкцыямі нібыта ў межах плану «Перамога».
У сувязі з гэтым Сітуацыйна-аналітычны цэнтр паведаміў: інструкцыі да ўдзелу ў плане «Перамога» будуць рассылацца толькі пасля абвяшчэння падвышанай ці поўнай ступені гатовасці і толькі з чат-ботаў, спасылкі на якія даюцца ў каналах супольнасці і праз афіцыйны бот (@plan_peramoga_bot у Telegram).
У выпадку падазрэнняў прапаноўваюць звязвацца праз бот @OSB_By_Pol у Telegram або праз пошту sacbelarus@protonmail.com. Прадстаўнікі ініцыятывы нагадваюць, што могуць папрасіць аб відэасувязі з удзельнікамі плану.
Прыклады «фальшывага Байполу» раней прывёў блогер Антон Матолька. Людзей заклікалі ў пэўны час прыйсці ў пэўнае месца і забраць «схрон». На думку блогера, такія паведамленні прыйшлі тым, хто зарэгістраваўся ў фэйкавым боце, меркавана, створаным сілавікамі.
Такія фальшывыя паведамленні могуць быць не проста жартамі, а падставай для крымінальнай справы: беларускія сілавікі назвалі «ByPol» і план «Перамога» «экстрэмісцкімі фармаваннямі», а за ўдзел у такіх фармаваннях пагражаюць крымінальнай адказнасцю з пакараннем да 7 гадоў пазбаўлення волі.
АА belsat.eu