Ціханоўская сустрэлася з прэм’ерам Румыніі і выступіла на Мюнхенскай сустрэчы ў Бухарэсце
Абраная прэзідэнтка Беларусі Святлана Ціханоўская сустрэлася з прэмʼер-міністрам Румыніі Нікалаэ Чукэ. Гэта першая сустрэча Ціханоўскай і кіраўніка румынскага ўраду.
Святлана Ціханоўская і Нікалаэ Чукэ абмеркавалі захады міжнароднай супольнасці, каб не дапусціць уваходу беларускай арміі ў вайну супраць Украіны, а таксама план эканамічнай дапамогі Беларусі. Раней гэты план ініцыявалі Румынія, Польшча і Літва, ён прадугледжвае вылучэнне для Беларусі трох мільярдаў еўраў на правядзенне транзіту і неабходных рэформаў. Абраная прэзідэнтка Беларусі заклікала Румынію адрозніваць рэжым Лукашэнкі і беларускі народ і аказаць падтрыманне ініцыятывам, скіраваным на ўмацаванне незалежнасці і беларускай нацыянальнай ідэнтычнасці.
Прынялі Святлану Ціханоўскую ў румынскім парламенце. Таксама беларуская палітычная дзяячка выступіла на Мюнхенскай канферэнцыя лідараў. У сустрэчы прымалі ўдзел 75 палітычных лідараў, афіцэраў і экспертаў з 25 краінаў, у тым ліку прэзідэнт Румыніі, міністры замежных справаў Албаніі, Румыніі, Харватыі, Славеніі, Чэхіі, Паўночнай Македоніі, кіраўнік канцылярыі Шольца ды іншыя.
У сваім выступе Ціханоўская заклікала прызнаць рэжым Лукашэнкі спонсарам тэрарызму і пашырыць санкцыі на працаўнікоў дзяржаўных медыяў, КДБ і спецслужбаў. Таксама Ціханоўская заклікала пашырыць выдачу візаў для беларусаў у беларускіх гарадах і падтрымаць рэпрэсаваных.
«Расея падарвала суверэнітэт Беларусі падпісаннем новых дамоваў аб вайсковай і эканамічнай інтэграцыі. Яны падпісаныя з дыктатарам, які не мае права нічога падпісваць ад імя народу, пасля таго, як страціў усялякую легітымнасць у 2020 годзе», – нагадала Святлана Ціханоўская.
Таксама Ціханоўская сустрэлася з беларусамі Румыніі і выступіла ва ўніверсітэце Бухарэсту. У новым семестры ва ўніверсітэце будзе выкладацца курс беларусазнаўства.
Алена Аляксандрава belsat.eu
