На 50-цігоддзе журналіста каля яго помніка сабраліся калегі з Украіны і Беларусі, паведамляе радыё «Свабода».
Акцыю памяці ініцыяваў Беларускі саюз журналістаў. Намеснік старшыні БАЖ Барыс Гарэцкі ў сваёй прамове адзначыў, што Павел Шарамет з 90х гадоў быў прыкладам для журналістаў на радзіме: «Мы ня можам сабрацца ў Менску, правесці вечар памяці, узгадаць яго. Але мы тут, на тым месцы, дзе скончыўся жыццёвы шлях Паўла, дзе яго жудасным чынам забілі, каб застрашыць іншых журналістаў-расследвальнікаў, публіцыстаў. Але ягонае імя і ягоная праца і жыццё працягваецца ў нашай памяці».
Галоўная рэдактарка інтэрнэт-выдання «Українська правда» Сяўгіль Мусаева дадала, што ўдзячная беларускім журналістам за іхную ініцыятыву ўшанаваць памяць Паўла Шарамета ў дзень ягонага нараджэння. Яна падкрэсліла, што Шарамет, калі б быў жывы, актыўна б удзельнічаў у абароне землякоў-калегаў, бо блізка прымаў да сэрца падзеі на радзіме.
Кіраўнік Нацыянальнага саюзу журналістаў Украіны Сяргей Таміленка дадаў, што Шарамет застаецца прыкладам для маладых журналістаў і так працягваецца справа ягонага жыцця.
МГМ, belsat.eu
