«Белсат» цяпер даступны дзвюм трацінам насельніцтва Літвы проста ў тэлевізары. І па-ранейшаму даступны ва ўсім свеце праз інтэрнэт.
Тэлеканал «Белсат» трапіў у літоўскі нацыянальны лічбавы мультыплекс MUX-2 – каля 1,7 млн літоўцаў у Вільні, Коўне, Друскеніках і іншых гарадах Літвы могуць глядзець нас праз звычайны тэлевізар. З 28 ліпеня ў гэтым мультыплексе таксама каналы «TVP Vilnius», «TVP Info», «TVP Historia 2», «TVP Polonia» і «TVP World».
«У сувязі з бягучай палітычнай сітуацыяй у нашым рэгіёне наша дзейнасць мае асаблівае значэнне для ахопу як мага большай аўдыторыі дакладнай і аб’ектыўнай інфармацыяй», – кажа сябра ўправы Польскай тэлевізіі Матэўш Матышковіч.
Трансляцыя «Белсату» ў стандарце лічбавага наземнага тэлебачання ў Літве пачалася яшчэ ў канцы траўня, але тады – толькі на 20 % насельніцтва Літвы, цяпер жа пашырылася на дзве траціны.
Глядзець «Белсат» можна таксама праз спадарожнікі «Астра 4A» (ранейшая назва «Sirius 4») на часціне – 12 303 МГц, гарызантальная палярызацыя 12303H, дадатковыя параметры: мадуляцыя DVB-S, FEC 7/8, SR 25546 (як варыянт, вы можаце таксама выбраць «аўтаматычны пошук каналаў» i дазволіць рэсіверу самому абнавіць спіс усіх каналаў).
Можна глядзець «Белсат» і праз інтэрнэт-старонку, і ў праграме для Smart-TV, і ў дадатках для Android і iOS, і ў трансляцыі на YouTube.
Алесь Наваборскі belsat.eu
