Гэта першая тэлефонная размова з пачатку поўнамаштабнай вайны Расеі паміж дзяржсакратаром ЗША Энтані Блінкенам і міністрам замежных спраў РФ Сяргеем Лаўровым.
Энтані Блінкен расказаў, што тэлефонная размова з Лаўровым была «адкрытай і прамалінейнай».
Падчас размовы амерыканскі дыпламат заклікаў Лаўрова пагадзіцца на прапанову ЗША аб вызваленні двух незаконна затрыманых у РФ грамадзян ЗША – Пола Уілана (прызналі вінаватым у шпіянажы) і баскетбалісткі Брытні Грайнер (затрымалі ў аэрапорце нібыта за правоз наркотыкаў), паведамляе CNN.
«Я ціснуў на Крэмль, каб той прыняў істотную прапанову, якую мы вылучылі па вызваленні Пола Уілана і Брытні Грайнер», – сказаў Блінкен.
Палітыкі размаўлялі таксама аб разблакаванні экспарту збожжа з Украіны праз Чорнае мора. Блінкен заклікаў Лаўрова ад імя многіх краін свету выконваць тое, на што Расея пагадзілася ў Стамбуле, і зрабіць магчымым экспарт збожжа з украінскіх партоў праз Чорнае мора.
«Важна, што ён пачуў непасрэдна ад мяне ад імя многіх краін чакання таго, што Расея зробіць наступныя крокі згодна з дамоўленасцямі, спыніць блакаду і дасць магчымасць караблям прайсці», – адзначыў дзяржсакратар.
Таксама Блінкен выказаў пазіцыю ЗША наконт намераў Расеі анексаваць новыя ўкраінскія тэрыторыі.
«Я выразна выказаўся, якія іх дзеянні мы прадбачым у наступныя тыдні і месяцы, уключаючы псеўдарэферэндумы на гэтых украінскіх тэрыторыях, спробы імітаваць, быццам насельніцтва гэтых тэрыторый хоча далучэння да Расеі, і выканаць палітычныя мэты Пуціна – захапіць столькі тэрыторыі Украіны, колькі атрымаецца, і спрабаваць знішчыць Украіну як незалежную суверэнную дзяржаву. Важна, каб расейцы чулі ад нас наўпрост, што з гэтым не змірацца, і Расеі, калі яна працягне рэалізоўваць гэтыя планы, давядзецца заплаціць дадатковую цану», – сказаў Энтані Блінкен.
Апошні раз дзяржаўны сакратар ЗША і міністр замежных спраў Расеі правялі тэлефонныя перамовы 12 лютага, за два тыдні да поўнамаштабнага расейскага ўварвання ва Украіну.
Алена Рувіна belsat.eu