Падчас суду яго змясцілі ў клетку ў адных майтках, рукі прыкавалі кайданкамі да кратаў.
Паводле словаў блізкіх Уладзіміра Гундара, адзенне падсудных правяралі рэнтгенам, пасля чаго падсудныя мелі яе адразу апранаць, што можа кепска паўплываць на здароўе.
«Учора тата адмовіўся даваць на прасвечванне адзенне і сказаў, што, калі без гэтага нельга, то ён гатовы не ісці на паседжанне, а заставацца ў камеры. Тады яго на руках зацягнулі ў залу паседжання ў тым, чым быў апрануты і без абутку. Адвакат Уладзіміра ўчора хадзіла на сустрэчу з намеснікам начальніка турмы з гэтым пытаннем (каб адмянілі прасвечванне). Безвынікова. Сёння, некалькі я разумею, тата таксама адмовіўся даваць адзенне. Тата стаяў у клетцы ў адных трусах, рукі былі прышпіленыя кайданкамі да кратаў у расцяжцы», – напісала ў сваім пабліку Інга Стромская.
Яна паведамляе, што суддзя ігнараваў звароты падсуднага і адваката, а потым увогуле загадаў выдаліць Уладзіміра з залі паседжанняў.
«Тата заспяваў песню. Суддзя выслухаў і сказаў выдаліць з залі паседжанне. Тады тата сказаў, што аб’яўляе сухую галадоўку і калі да яго будуць зроблены нейкія гвалтоўныя меры, сказаў, што ён «ускрыецца», – напісала Інга.
Праваабаронцы паведамляюць, што Мікалай Аўтуховіч, а таксама Уладзімір Гундар, Вольга Маёрава і Галіна Дзербыш не прызналі віну ні па адным артыкуле.
Сяргей і Павел Рэзановічы, а таксама Віктар Снегур прызналі сябе вінаватымі часткова, а Ірына Гарачкіна і Антон Мельхер − вінаватымі цалкам.
Мікалай Аўтуховіч будзе даваць свае паказанні па справе апошнім.
Марыя Мурашка belsat.eu