Расейскі бок плануе правесці «рэферэндум» аб анексіі Данецкай вобласці. Яго прызначылі на 11 верасня 2022 года, паведамляе дарадца мэра Марыупалю Пятро Андрушчанка.
«Акупацыйныя адміністрацыі атрымалі ўказанні падрыхтаваць месцы правядзення і камісіі ды перадалі іх у прыватнасці камітэтам самаарганізацыі насельніцтва. Рыхтуюць правядзенне пад святкаванне вызвалення Данбасу ад нацысцкіх захопнікаў. Адначасова з савецкім Днём Марыупалю», – напісаў Андрушчанка ў сваім тэлеграм-канале.
У пачатку чэрвеня прэс-сакратар прэзідэнта РФ Дзмітрый Пяскоў заяўляў, што правядзенне рэферэндуму аб уваходжанні Данбасу ў РФ у цяперашніх умовах наўрад ці магчымае, спачатку трэба запэўніць бяспеку рэспублік.
Паводле звестак украінскай выведкі, расейцы таксама плануюць «рэферэндумы» ў Херсонскай і Запарожскай вобласцях 11 верасня. У гэты дзень праходзяць выбары ў Расеі.
Раней у МЗС Украіны заявілі, што ні адна краіна свету не прызнае вынікаў фальшывых «рэферэндумаў» на акупаваных Расеяй тэрыторыях.
Алена Рувіна belsat.eu