Васілевостраўскі раённы суд Санкт-Пецярбургу пакінуў беларуску Яну Пінчук у СІЗА да 30 ліпеня. Пра гэта паведамляе карэспандэнт «Вот Так» з суда. На пасяджэнне не пусцілі журналістаў і слухачоў.
Паводле адвакаткі Марыі Бяляевай, абарона настойвала на змене меры стрымання на хатні арышт.
Яну Пінчук заводзяць у залу пасяджэння. Відэа: «Вот Так»
«У Яны на руках ужо ёсць пастанова аб экстрадыцыі. Мы паралельна з гэтым судом абскардзім пастанову. Цяпер галоўнае – выйграць час і дамагчыся адмены экстрадыцыі. Суд для абскарджання экстрадыцыі яшчэ не прызначаны», — распавяла карэспандэнту «Вот Так» Марыя Бяляева.
Раней Расея ўхваліла выдачу Яны Пінчук у Беларусь.
У Беларусі Яну Пінчук вінавацяць паводле пяці артыкулаў Крымінальнага кодэксу за адміністраванне тэлеграм-чату «Віцебск 97 %», прызнанага ўладамі экстрэмісцкім. Паводле версіі беларускага следства, у тэлеграм-канале Яна Пінчук пад нікам Прынцэса Лея размяшчала паведамленні з «негатыўнай ацэнкаю супрацоўнікаў праваахоўных органаў і органаў дзяржаўнай улады». Акрамя таго, нібыта публікавала «заклікі да прычынення шкоды міліцыянтам» і «экстрэмісцкія матэрыялы». Пра якія канкрэтна матэрыялы ідзецца, невядома, адзначаюць адвакаты дзяўчыны.
Яна Пінчук не адмаўляе адміністравання каналу, але сцвярджае, што ў ім было яшчэ некалькі карыстальнікаў з нікнэймам Прынцэса Лея. Свой акаўнт пасля абвяшчэння ўладамі каналу экстрэмісцкім Пінчук, са словаў абаронцаў, выдаліла. Пасля арышту Яна прасіла палітычнага прытулку ў Расеі.
У РФ 24-гадовая Яна Пінчук пераехала ў 2018 годзе, з лістапада 2021-га яна застаецца ў ізалятары. Следчы камітэт Беларусі адправіў расейскім сілавікам дакументы на экстрадыцыю. На радзіме дзяўчыне пагражае да 20 гадоў зняволення.
Аляксандр Скрыльнікаў / КВ «Вот Так»
