Трэцяя цырымонія ўручэння прэміі Міхала Анемпадыстава прайшла ў Менску 29 красавіка ў онлайн-фармаце.
Пераможцам у конкурсе назвалі Алену Дашкевіч, аўтарку вокладкі кнігі «Простыя словы. Міхал Анемпадыстаў» (Stowarzyszenie Młodych Twórców – «Ku Teatrowi», сувыдавец – Agencja Wydawnicza Ekopress, 2020). Кніга — складанка ўспамінаў сяброў мастака, напісаная праз некалькі месяцаў пасля яго смерці.
Пераможца расказала, што хацела скарыстаць на вокладцы менавіта фатаздымак, каб кніга адразу паказала чытачу, пра якога яна чалавека, і каб назва «Простыя словы» асацыявалася з гэтым чалавекам.
«Трэба было знайсці фатаздымак менавіта такі, які адпавядаў бы характару Міхала, – сказала Алена Дашкевіч. – Не проста прыгожы фатаздымак, дзе ён усміхаецца, такія таксама ёсць. Я хацела прынцыповасці Міхала, таго, што Міхал быў правадыром нейкіх ідэяў. Для яго было вельмі істотна, каб іншыя слухалі. І таму яго вось гэты жэст».
Асобным дыпломам адзначылі пераможцу галасавання гледачоў «Белсату» – вокладку кнігі «Беларуская нацыянальная ідэя».
У шорт-ліст прэміі таксама ўвайшлі:
- Анатоль Лазар – аўтар вокладкі кнігі «Беларуская нацыянальная ідэя», Зміцер Лукашук, Максім Гаруноў. Медысонт, 2020.
(Менская абласная экспертная камісія па ацэнцы інфармацыйнай прадукцыі дала заключэнне, што кніга змяшчае «прыкметы праяўлення экстрэмізму»). - Кацярына Даманікава, Андрэй Ганчарук – аўтары вокладкі кнігі «Лотас на асфальце», Алесь Плотка. Люта Справа, 2020.
- Павел Дарохін – аўтар вокладкі кнігі «Нарысы сучаснага краязнаўства», Збых Слупоўскі. Галіяфы, 2020.
- Павел Дарохін – аўтар вокладкі кнігі «Папяросы», Юры Іздрык (пераклад на беларускую – Алесь Плотка). Галіяфы, 2020.
- Наталля Паваляева – аўтарка вокладкі кнігі «ROT», Юля Цімафеева. Янушкевіч, Вясна, 2020.
Агулам на прэмію сёлета прэтэндавалі вокладкі 28 кнігаў. Адна з вядоўцаў, літаратарка Вольга Бабкова адзначыла, што падзеі мінулага году пабудзілі ў Беларусах надзвычайны творчы патэнцыял, таму выбар пераможцы сёлета быў надзвычай складаным.Журы кіравалася не толькі дызайнам вокладкі і паліграфічным выкананнем, але і адпаведнасці дызайну вокладкі і зместу кнігі.
Другі вядоўца прэміі, культуролаг і кінакрытык Максім Жбанкоў згадаў прымаўку «не трэба меркаваць аб кнізе па вокладцы» і заявіў, што Міхал Анемпадыстаў як ніхто іншы ведаў, што гэта няпраўда. Дызайнер, казаў Жбанкоў, умеў ператвараць «штодзённасць у магію».
Перад пераможцамі выступіла Кася Камоцкая – спявачка, у рэпертуары якой нямала песень на вершы Анемпадыстава.
Ініцыятыва адзначаць найлепшую вокладку да беларускай кнігі належыць Беларускаму ПЭН-цэнтру сумесна з Саюзам беларускіх дызайнераў і «Лятучым універсітэтам», а таксама польскім партнёрам ТАА «H&L» і фондам «Адкрытая культура». Генеральным партнёрам прэміі з’яўляецца тэлеканал «Белсат».
Прэмія заснавана ў 2019 годзе ў памяць пра чалавека многіх талентаў – мастака, паэта, фатографа, дызайнера, публіцыста, культуролага Міхала Анемпадыстава, які пайшоў з жыцця тры гады таму. Першым пераможцам прэміі стаў Грыгорый Кацнэльсон за вокладку кнігі «Віленскі покер» Рычарда Гавяліса, у 2020 годзе прэмію атрымала дызайнерка Кацярына Пікірэня за вокладку кнігі «Трое ў чоўне і пёс з імі» Джэрома К. Джэрома.
АА belsat.eu
