У Менску пачаўся суд над абвінавачанымі ў справе анархісцкай групы «Прамень»

Сёння, 29 сакавіка, у Менскім абласным судзе пачнецца разгляд крымінальнай справы супраць «экстрэмісцкага фармавання» «Прамень». У справе былі затрыманыя: Яўген Рубашка, Аляксандр Бялоў і два цёзкі – Арцёмы Салаўі. Мы сабралі ў адным тэксце гісторыі сяброў аб затрыманых анархістах.

Злева направа партрэты Арцёма Салаўя, Яўгена Рубашкі, Аляксандра Бялова на выставе ў моладзевым хабе ў Варшаве, Польшча. 19 лютага 2020 года. Фота Аліса Ганчар / Белсат

Яўгена Рубашку і Аляксандра Бялова арыштавалі 29 ліпеня 2021 года, Арцёмаў Салаўёў – 4 жніўня 2021 года. ГУБАЗ апублікаваў відэа затрымання, паводле якога можна меркаваць, што да маладых людзей ужылі гвалт. Раней анархісты мелі адміністратыўныя спагнанні за ўдзел у розных пратэсных акцыях. Іх судзяць паводле «народнага» арт. 342 ч. 1 КК РБ, а таксама за стварэнне або ўдзел у экстрэмісцкім фармаванні «Прамень» (арт. 361 ч. 1.3 КК РБ).

Яўген Рубашка. Фота з сацыяльных сетак

Яўген Рубашка

Яўген Рубашка не быў падчас выбараў 2020 года ў Беларусі. Ён жыў у Амстэрдаме, дзе працаваў праграмістам. «Добра зарабляў, і для яго было нармальна аддаваць палову зарплаты, калі камусьці патрэбная дапамога», – пра гэтую якасць кажуць усе сябры Яўгена.

Да падзеяў 2020 года не ўдзельнічаў у беларускім актывізме. Сябры Яўгена распавядаюць, што прыехаў у Беларусь ён у верасні з велізарным жаданнем і энергіяй. Рубашку затрымлівалі за Партызанскі марш і ў двары Пераменаў, за што ён адседзеў содні. Пра тыя падзеі можна прачытаць у ягоным дзённіку тут і тут.

Аляксандр Бялоў. Фота з сацыяльных сетак

Аляксандр Бялоў

«Сашу Бялову можна было ноччу патэлефанаваць і спытаць аб дапамозе – ён заўсёды адгукаўся. Крэмень, сведчанняў не даваў наогул». Аляксандр – удзельнік ФНБ [ініцыятыва «Ежа замест бомбаў»] і працаваў у дабрачынным праекце «KaliLaska». Да затрымання адпрацоўваў размеркаванне пасля ўніверсітэту. Аляксандр мог з’ехаць у любы момант, у яго была «карта паляка», але застацца – гэта быў свядомы выбар. Аляксандр Бялоў і Яўген Рубашка ў 2021 годўе прыязджалі ў Варшаву пабачыцца з сябрамі. Праз 10 дзён хлопцы вярнуліся ў Беларусь. А праз некаторы час да іх дадому прыйшлі супрацоўнікі ГУБАЗу.

Арцём Салавей. Фота з сацыяльных сетак

Арцём Салавей

Арцёмы Салаўі не родзічы, яны пазнаёміліся ў грамадзянскім руху і пасябравалі.

Першы Арцём Салавей цікавіцца праграмаваннем і кампутарнай бяспекай, вёў у БНТУ гурток робататэхнікі. Сябры кажуць пра яго як пра вельмі спакойнага чалавека. Арцём адседзеў 8 содняў за марш 6 верасня, 25 содняў пасля першага дваровага маршу, 15 содняў прэвентыўна напярэдадні Дня Волі ў 2021 годзе. Пасля трэцяга арышту і ператрусу ён разумеў, што на яго будзе заведзена крымінальная справа, але зʼязджаць з Беларусі не пажадаў.

Арцём Салавей. Фота з сацыяльных сетак

Яшчэ адзін Арцём Салавей быў асуджаны на 15 содняў напярэдадні 25 сакавіка 2021 года. Сябры кажуць, што ён любіць чытаць, ён надзвычай спакойны чалавек. Арцём ездзіў на ровары ў любое надворʼе. Працаваў рабочым і кухарам, праца адымала ў яго шмат сілаў. «У любой сітуацыі, як бы яму ні было цяжка, ён гатовы прыйсці на дапамогу». Арцём быў актывістам ФНБ на працягу некалькіх гадоў.

belsat.eu

Падпісвайся на telegram Белсату

Hавiны