Каманда экс-прэтэндэнта на пасаду прэзідэнта Беларусі, былога кіраўніка «Белгазпрамбанку» Віктара Бабарыка апублікавала ягоны зварот са следчага ізалятару.
Палітык заклікаў не спыняцца на паўдарозе і стварыць партыю «Разам».
«Я ніколі не быў ні ў якой партыі і не думаў, што такая форма аб’яднання людзей мае права на існаванне ў XXI стагоддзі. Але беларусы паказваюць, што я не меў рацыю. Нам патрэбная партыя. Але партыя не як самамэта, а як найбольш эфектыўны інструмент дасягнення нашай перамогі», – заявіў ён.
Паводле яго, партыя павінна:
- паказаць большасць людзей, якія стаміліся жыць у атмасферы хлусні, нянавісці і страху;
- аб’яднаць дзеянні разрозненых самастойных ініцыятываў;
- забяспечыць працу групаў і абʼяднанняў ды аднавіць дзейнасць унутры краіны.
«Мы абавязаныя зрабіць партыю «Разам». Мусім дапамагчы адно аднаму паверыць у сябе, у суседа, у сваю краіну. Нельга пакідаць ракавую пухліну страху і бездапаможнасці нашым дзецям і ўнукам», – адзначыў Віктар Бабарыка.
Пра стварэнне сваёй партыі «Разам» палітык заявіў у загадзя запісаным відэазвароце, які быў апублікаваны 1 верасня 2020 года. З чэрвеня Віктар Бабарыка застаецца за кратамі.
МГ belsat.eu
