У Маскве каля амбасады Беларусі паліцыя затрымала дзевяць чалавек. Пра гэта паведамляе ОВД-Инфо.
Увечары 28 сакавіка каля беларускай амбасады, дзе пасля прэзідэнцкіх выбараў 9 жніўня 2020 года праходзяць акцыі пратэсту, сабраліся людзі. Але сілавікі завялі іх у аўтазак і даставілі ў АУС Басманнага раёну. Сярод затрыманых быў адзін няпоўнагадовы.
Праз некаторы час з паліцэйскага пастарунку ўсіх адпусцілі. Людзей вызвалілі без пратаколаў пасля «прафілактычнай гутаркі».
У Санкт-Пецярбурзе 24 сакавіка паліцыя затрымала пяцярых беларусаў за відэазварот у падтрыманне суайчыннікаў. Усіх іх 25 і 26 сакавіка суды пакаралі арыштамі. Аднаго з затрыманых адпусцілі адразу пасля суда, але паліцыянты зноў яго затрымалі. Таксама дваіх удзельнікаў запісу відэазвароту затрымалі 28 сакавіка на выхадзе з спецпрыёмніку.
МГ belsat.eu