174-ы дзень пратэстаў: бел-чырвона-белы сцяг плануюць забараніць, у Горадні агляды, новыя прысуды
Паслявыбарчыя пратэсты ў Беларусі працягваюцца 174-ы дзень. «Белсат» сабраў галоўныя падзеі дня.
Генпракуратура збіраецца забараніць БЧБ-сцяг
Тэматычную позву дня сёння абрала Генеральная пракуратура. Ва ўстанове рыхтуюць пакет законаў, каб вызнаць бел-чырвона-белы сцяг эсктрэмісцкім. Адпаведныю петыцыю нібіта прынеслі «неабыякавыя грамадзяне» – іх подпісаў ужо больш як сотня. Былая кандыдатка на прэзідэнцкую пасаду Святлана Ціханоўская лічыць, што адваротны зварот мае лепшыя перспектывы.
«У паведамленні пракуратуры гаворыцца пра петыцыі сотні грамадзянаў. Але я ўпэўненая, што петыцыя ў абарону гэтага сцяга збярэ сотні тысяч подпісаў»
Выказаўся ў абарону сцяга і прадстаўнік дзейных уладаў – дэпутат Валер Варанецкі.
«З ім былі звязаны вельмі важныя старонкі гісторыі нашай з вамі маладой беларускай дзяржавы. І таптацца па сваім мінулым, калі мы глядзім у будучыню і хочам пабудаваць моцную, незалежную і квітнеючую краіну, на мой погляд, — недапушчальна. Мы павінны шанаваць сваю гісторыю»
У гарадзенскіх рэдакцыях адбыліся агляды
Сілавікі з Горадні вырашылі актыўна правесці апошні дзень працоўнага тыдня. Зранку з з аглядам завіталі у рэдакцыю Hrodna.life і дамоў да галоўнага рэдактара Newgrodno.by Ігара Рэмзіка.
Прэс-сакратар гарадзенскай міліцыі Яўген Дудко паведаміў, што агляд у Hrodna.life адбываецца паводле адміністратыўнай справы ў дачыненні галоўнага рэдактара парталу Аляксея Шоты. Падставаю сталіся тры матэрыялы на сайце, у адным з якіх, напрыклад, паведамляецца, што тэлеграм-канал «NEXTA-Live» прызнаны ў Беларусі экстрэмісцкім, таму ўсім варта выдаліць інфармацыю ды матэрыялы, узятыя з гэтага каналу, іначай можа быць адказнасць (арт. 17.11.2. адміністратыўнага кодэксу). Рэдактар Newgrodno.by Ігар Рэмзік паведаміў, што яго апыталі, з кватэры забралі сістэмны блок камп’ютара. На яго таксама завялі адміністратыўную справу паводле арт. 17.11.2.
Новыя прысуды па «крыміналках»: «хімія» за страйк, хатняя «хімія» – за марш
Беларускі судовы канвеер не жадае спыняцца. Акрамя шэрагу адміністратыўных спраў агучылі вынікі па дзвюх крымінальных. Суд Савецкага раёну Менску прызнаў студэнта БДУІР Арцёма Вінакурава вінаватым паводле ч. 1 арт. 342 КК («Арганізацыя і рыхтаванне дзеянняў, якія груба парушаюць грамадскі парадак») і пакараў яго трыма гадамі «хіміі». Падставаю для крымінальнай пераследу Арцёма стаўся той факт, што 26 кастрычніка ён зайшоў у аўдыторыю, дзе вёў заняткі дэкан Леанід Шылін, і заклікаў студэнтаў далучыцца да агульнанацыянальнага страйку.
Троху больш пашанцавала 19-гадовай Рэнаце Смірновай. Крымінальную справу супраць яе распачалі за ўдзел у пратэставым маршы 1 лістапада. Следства сцвярджала, што дзяўчына груба парушыла грамадскі парадак на праспекце Незалежнасці: доўга пляскала ў далоні, крычала лозунгі і стаяла ў счэпцы. А таксама нібыта блакавала рух транспарту шляхам выхаду на дарогу і нанесла такім чынам шкоду «Менсктрансу» памерам 10 680 рублёў 76 капеек.
Суд Завадскога раёну Менску прызнаў Рэнату вінаватай па артыкуле 342 Крымінальнага кодэксу, аднак прызначыў менш жорсткае пакаранне – два гады абмежавання воля без накіравання ў адкрытую ва ўстанову папраўчага тыпу, то бок «хатнюю хімію». Выйшаўшы з судовай залы, дзяўчына з асалодай паглядзела на неба.
ЯП, belsat.eu
