У Менску, Пінску, Берасці і іншых гарадах Беларусі ў экспрэс-рэжыме судзяць затрыманых напярэдадні грамадзянаў.
28 жніўня судзілі пратэстоўцаў, затрыманых 27 жніўня ў перыметры ад плошчы Свабоды да плошчы Незалежнасці ў Менску. Удзельнікам акцыяў, па стане на 16 гадзіну, суддзі даюць пераважна штрафы ад 5 да 25 базавых велічыняў (да Br 675). Некаторыя справы выканаўцы накіроўваюць на дапрацоўванне. Але ў судзе Савецкага, Цэнтральнага і Першамайскага раёнаў Менску сярод штрафаў сустракаюцца тэрміны да 10 содняў арышту.
Паводле прэсавай службы «Беларускай асацыяцыі журналістаў» на чатырох журналістаў, якія адмовіліся паказаць сілавікам фота на сваіх мабільных прыладах, склалі пратаколы паводле артыкулу «удзел у несанкцыянаванай акцыі».
Гэта датычыць журналістаў Максіма Калітоўскага, Аляксандра Васюковіча, Андрэя Ярашэвіча, Кацярыны Андрэевай, якіх да суда трымалі ў актавай залі Кастрычніцкага РУУС. Журналістка «Белсату» Кацярына Андрэева раніцай 28 жніўня праз відэасувязь у судзе паведаміла:
«Я правяла ноч у актавай залі Кастрычнікага РУУС. Пачуваюся добра, але ад учора нічога не ела, хаця нейкую ежу мне прапаноўвалі. Такім чынам, абвяшчаю галадоўку».
Суд над фатографам Аляксандрам Васюковічам праходзіў таксама праз уэб-камеру. Яго затрымалі разам з усімі журналістамі на пл. Свабоды 27 жніўня ў Менску. Артыкул той жа – 23.34 КаАП РБ. У судзе Васюковічу ставілі ў віну, што на плошчы ён не толькі выконваў працу, але і нібыта крычаў «Жыве Беларусь». Аляксандр адмаўляе гэты факт, аргументуючы гэта парушэннем журналістыкай этыкі. Праз працяглага перапынку Аляксандра Васюковіча, Кацярыну Андрэеву і Максіма Калітоўскага вызвалілі, адправіўшы іх справы на дапрацоўку.
Шведскага журналіста, пераможцу Пола Хансена на 5 гадоў дэпартуюць з Беларусі. Да Кастрычніцкага РУУС, дзе знаходзіліся затрыманыя журналісты, 27 жніўня прыязджала амбасадарка Швецыі ў Беларусі Крысціна Юханесан.
Журналістку БелаПАН Таццяну Каравянкову з РУУС 27 жніўня забрала хуткая дапамога.
Поўны СПІС ЗАТРЫМАНЫХ 27 ЖНІЎНЯ знойдзеце на старонцы праабаарончага цэнтру «Вясна».
А 10-ай гадзіне ў судзе Ленінскага раёну распачаўся суд над вакалістам гурта «Дай Дарогу» Юрыем Стыльскім паводле артыкулу 23.34 КаАП (парушэнне парадку арганізацыі або правядзення масавых мерапрыемстваў).
На лаве падсудных таксама Наталля Клімовіч, якую затрымалі фактычна за ейны бел-чырвона-белы строй.
Праваабаронцу з БХК Леаніда Мархотку прысудзілі 10 содняў адміністрацыйнага арышту.
У судзе Чыгуначнага раёну Гомля разглядаюць адміністрацыйныя пратаколы, складзеныя у ноч з 9-га на 10-га жніўня супраць экс-супрацоўніка МНС Андрэя Васілішчанкі. У судзе Цэнтральнага раёну Гомеля судзяць 18-гадовую гамяльчанку Елізавету Кіржанаву за ўдзел у несанкцыянаваным мітынгу. Пасля затрымання дзяўчыну моцна збілі за адмову разблакаваць тэлефон.
Разглядаць будуць апеляцыі на 15 содняў арышту для Мікіты Шалаева, на 10 содняў для Паўла Пагарцава, і штрафы Леаніду Пузікаву, Дзянісу Пазнякову, Ганне Карэцкай і Аляксандры Рымаравай.
У Пінску 28 жніўня вывесілі поўны спіс затрыманых і асуджаных ад пачатку пратэстаў. Гэта 103 асобы.
«Сёння толькі да аднаго суддзі было 11 чалавек. У будынку суда бачылі і маладых людзей, па справах пратэстаў, якіх павялі да іншага суддзі. Больш за 20 чалавек», – паведаміў карэспандэнт «Белсату».
У Светлагорскім раённым судзе ў пятніцу а 14:00 пачалі разгляд справы Вадзіма Паветкі, якога судзяць за ўдзел у велапрабегу 9 жніўня. Таго ж дня яго змясцілі ў ІЧУ, адкуль даставілі ў шпіталь.
У судзе Жодзінскага раёну судзілі Івана Арлова. Яго вінавацяць ва ўдзеле ў несанкцыянаваным масавым мерапрыемстве па арт 23. 34 КаАП.
У Нясвіжскім раённым судзе а 15:30 адказваць будуць удзельнікі велапрабегу ў Радзівілаўскім парку, які праваахоўнікі лічаць несанкцыянаваным пікетам. Гэта ўжо другое паседжанне. На лаве таксама Анжаліка Мельнікава, якую вінавацяць у закліках гараджанаў, каб ехалі на акцыі пратэстаў у сталіцу.
У Хойніках разглядаюць адміністрацыйную справу блогера Яўгена Васількова. Артыкул 17.1 (дробнае хуліганства). Дзе калі хуліганіў – блогер не ведае.
ЮЦ, Belsat.eu