Віктар Бабарыка ў калоніі вымушана прышчапіўся расейскай вакцынай ад каронавірусу
Віктар Бабарыка, які зараз знаходзіцца ў папраўчай калоніі ў Наваполацку, у адным з апошніх лістоў паведаміў, што зрабіў прышчэпку супраць каронавіруса.
Ён напісаў, што зрабіў гэта з-за пагрозаў пазбаўлення спатканняў з блізкімі.
«Я быў вымушаны яе зрабіць, бо пужалі адмовай ад сустрэчы з роднымі. Таму атрымаў Спутнік V і ўсё ж выжыў», – напісаў у лісце Віктар Бабарыка.
Пра свой Дзень народзінаў, які быў 9 лістапада, Бабарыка распавёў, што ўсё было ціха і спакойна: «Вы павінны чуць, што ў гэтым месцы ўсім людзям забараняецца камунікаваць са мной. Таму нічога не было і нічога смачнага не еў».
«Адносна працы, то ўсё па-старому. Нічога не змянілася, і жыву як у стужцы «Дзень сурка». Толькі герой гэтага кіно меў магчымасць развівацца, а ў гэтым месцы з інтэлектуальным развіццём вядзецца барацьба», – піша палітык.
Нагадаем, што ў верасні Віктар Бабарыка казаў пра пагаршэння ўмоў працы. У калоніі ён працуе ўкладчыкам хлебабулачных вырабаў і мусіць пастаянна знаходзіцца ў пякарні, дзе нават пры выключаных печах тэмпература перавышае 30°С, а памяшканне практычна не вентылюецца.
АД, belsat.eu
