У Кіеў 28 лістапада прыбылі з візітам міністры замежных справаў Эстоніі, Фінляндыі, Ісландыі, Латвіі, Літвы, Нарвегіі і Швецыі. Пра гэта напісаў у Twitter кіраўнік МЗС Эстоніі Урмас Рэйнсалу, выклаўшы здымак на фоне цягніка на кіеўскім вакзале.
«Мы, міністры замежных справаў, сёння ў Кіеве на знак поўнай салідарнасці з Украінай. Нягледзячы на масіраваныя ракетныя абстрэлы і варварскую жорсткасць Расеі, Украіна пераможа!» – напісаў Рэйнсалу.
Міністры правялі перамовы з кіраўніцтвам МЗС Украіны ды іншымі высокапастаўленымі чыноўнікамі.
Прэм’ер-міністр Украіны Дзяніс Шмыгаль паведаміў, што асноўнымі тэмамі сустрэчы ўрадоўцаў з міністрамі замежных справаў былі зброя, фінансы і санкцыі супраць Расеі. Таксама надалі ўвагу энергетычнай сферы і абстрэлам Расеяй крытычнай інфраструктуры Украіны.
«У 9-м санкцыйным пакеце разлічваем на паўнавартаснае адключэнне расейскіх банкаў ад SWIFT і забарону ўезду ў ЕЗ грамадзянаў дзяржавы-тэрарыста», – напісаў кіраўнік ураду.
Шмыгаль падзякаваў краінам Паўночнай Еўропы і Балтыі за іх дапамогу з энергетычным абсталяваннем.
Алена Рувіна belsat.eu