Поўнамаштабная вайна ва Украіне трывае 278-ы дзень. Расейскія войскі дзіўным чынам акопваюцца на левым беразе Дняпра, нібы не збіраюцца спыняць украінскі контрнаступ. «Белсат» расказвае, што вядома на раніцу.
Генеральны штаб Збройных сілаў Украіны заяўляе, што расейскія войскі засяроджваюць высілкі на стрымліванні дзеянняў украінскіх вайскоўцаў. Але расейскія войскі вядуць наступальныя дзеянні на ліманскім, бахмуцкім і аўдзееўскім напрамках. ЗСУ ў сваю чаргу адбілі атакі ў раёнах населеных пунктаў Якаўлеўка, Салядар, Бахмут, Андрэеўка, Навабахмутаўка, Вопытнае, Вадзяное, Першамайскае, Навасельскае і Наваміхайлаўка Данецкай вобласці.
Расейскія войскі нанеслі чатыры ракетныя ўдары па цывільных аб’ектах на Запарожжы і Днепрапятроўшчыне, звыш 50 абстрэлаў сістэмамі залпавага агню па ваенных і мірных аб’ектах. Абстрэлы фіксавалі на сіверскім, слабажанскім, купянскім, ліманскім, бахмуцкім, аўдзееўскім, навапаўлаўскім, запарожскім, крыварожскім і херсонскім напрамках.
З напрамку Беларусі ЗСУ не бачыць фармавання наступальных груповак. Падраздзяленні сілаў спецыяльных аперацыяў Беларусі, якія ўваходзяць у беларуска-расейскую «рэгіянальную групоўку», выконваюць заданні ў пасяленні абароны мяжы. Асобныя падраздзяленні войскаў Расеі, як чакаецца, будуць перакінутыя з Беларусі пасля навучання, але наўпрост ці праз Расею, ЗСУ не ўдакладняе.
Прэзідэнт Украіны Уладзімір Зяленскі ў звароце вечарам 27 лістапада казаў, што гэты тыдзень можа стаць самым складаным праз новыя ракетныя ўдары Расеі. Але Украіна рыхтуецца да ўсіх сцэнароў, «у тым ліку з нашымі партнёрамі». Расея ж, падобна, рыхтуецца далей адступаць з Херсоншчыны.
Амерыканскі Інстытут вывучэння вайны (ISW) звяртае асаблівую ўвагу на тое, што расейскія войскі чакаюць пераходу Дняпра ўкраінскімі войскамі ў раёне Херсону, з пачатку кастрычніка капаюць траншэі і ставяць супрацьтанкавыя ўмацаванні («зубы дракона») уздоўж наземных лініяў камунікацыі:
«Расейскія войскі відавочна не чакаюць, што змогуць перашкодзіць украінскім сілам пераправіцца праз раку, і не ставяць у прыярытэт абарончыя пазіцыі, каб спыніць такую пераправу», – піша ISW.
Ці праўда будуць украінцы спрабаваць пераправіцца праз Дняпро і стварыць трывалы плацдарм на левым (усходнім) беразе, ISW не ведае. Але фактычныя дзеянні расейскіх войскаў на Херсоншчыне сведчаць, што расейскае кіраўніцтва разглядае гэта як сур’ёзную пагрозу – і чакаюць, што Украіна зможа адваяваць спачатку Кінбурнскую касу, а потым пойдуць на «мацерыковую» частку левага берагу. Асобна ISW адзначае, што расейскія абарончыя пазіцыі бачныя каля дарог, а ўкраінскія войскі раней рухаліся па перасечанай мясцовасці, у тым ліку падчас харкаўскага контрнаступу. Выходзіць, украінскі контрнаступ збіраюцца не спыняць, а запавольваць.
Сам Херсон пасля вызвалення трапляе пад расейскія абстрэлы, заўважае брытанская выведка. Толькі за 24 лістапада ад расейскіх абстрэлаў у Херсоне загінулі 10 чалавек. За мінулы дзень зафіксавалі 54 абстрэлы Херсону. Горад застаецца ў дасяжнасці расейскай артылерыі і рэактыўных сістэмаў залпавага агню «Града», з якіх расейскія войскі страляюць з левага берагу Дняпра.
Кіраўнік украінскага «Энергаатаму» казаў, што бачыць знакі падрыхтоўкі адступлення расейскіх войскаў з Запарожскай атамнай электрастанцыі. Гэтую заяву заўважылі як на Захадзе, так і ў акупацыйнай адміністрацыі. Чуткі пайшлі і па расейскіх медыях. Акупацыйная адміністрацыя Энергадару, дзе знаходзіцца АЭС, у адказ заявіла, што захопленую станцыю здаваць не збіраюцца.
Тым часам амерыканскія чыноўнікі наракаюць у «The Wall Street Journal», што пастаўкі зброі ва Украіну перашкаджаюць доўгатэрміновым патрабаванням ва ўзбраенні Тайваню. Так, Кітайская Рэспубліка, якая рыхтуецца да магчымага нападу камуністычнага Кітаю, дагэтуль не атрымала замоўленыя яшчэ ў 2015 годзе «Джавеліны» і «Стынгеры». Але Пентагон запэўнівае, што ЗША працуюць над тым, каб і Украіна, і Тайвань маглі бараніцца.
Алесь Наваборскі belsat.eu