У спіс трансгранічных злачынстваў дамовы аб функцыянаванні Еўразвязу 28 лістапада вырашылі дадаць парушэнне абмежавальных захадаў. Рада Еўразвязу прыняла гэтае рашэнне адзінагалосна.
Міністр юстыцыі Чэхіі Павэл Блажэк растлумачыў, што гэтае рашэнне – важны інструмент, каб забяспечыць спыненне любых спробаў абысці санкцыі, накладзеныя на Расею за вайну ва Украіне.
Да таго розныя краіны Еўразвязу мелі розныя вызначэнні таго, што ёсць парушэннем санкцыяў і якія захады трэба рабіць у выпадку парушэнняў. А гэта магло прывесці да рознай якасці выканання санкцыяў і нават даць падсанкцыйным асобам доступ да іхных актываў і магчымасць падтрымліваць падсанкцыйныя рэжымы.
Гэтае рашэнне – першы з двух неабходных крокаў. Другім крокам мае стаць прапанова Еўракамісіяй дырэктывы з мінімальнымі правіламі вызначэння злачынстваў і пакаранняў за іх. Праект дырэктывы мае потым ухваліць Рада Еўразвязу і Еўрапарламент.
Пакуль дамова аб функцыянаванні Еўразвязу ўлічвае такія злачынствы, як тэрарызм, гандаль людзьмі, сексуальная эксплуатацыя, незаконнае абарачэнне наркотыкаў і зброі, адмыванне грошай і карупцыя, падробка плацежных сродкаў, арганізаваная злачыннасць і кіберзлачынствы.
Алесь Наваборскі belsat.eu