Сетка рэстаранаў «McDonald’s», верагодна, працягне сваю працу пад беларускім брэндам. Пра гэта піша партал «Zerkalo» са спасылкай на супрацоўнікаў кампаніі «КСБ Виктори Рестораны», якая мае франшызу ў Беларусі. Раней паведамлялася, што рэстараны правядуць рэбрэндынг і прадоўжаць працаваць пад расейскім брэндам «Вкусно – и точка». Аднак гэтага не адбылося.
Назву «McDonald’s» на «Вкусно – и точка» павінны былі змяніць яшчэ 22 лістапада, але гэтага не здарылася. А 28 лістапада рэстарацыі пачалі працаваць без шыльды і назвы. На некаторых з’явіўся надпіс «Мы открыты».
Па словах аднаго з супрацоўнікаў «КСБ Виктори Рестораны» учора ўвечары, 27 лістапада, супрацоўнікам скінулі інфармацыю толькі па новым меню, а на пытанні наконт зменаў кіраўніцтва адказвала, што самі толкам нічога не ведаюць і дзеляцца інфармацыяй па меры паступлення.
Раніцай супрацоўнікам паведамілі, што з сённяшняга дня, 28 лістапада, «McDonald’s» працуе як «самастойны беларускі брэнд». Пад якой назвай будуць працаваць кропкі рэстаранаў, не ўдакладняецца.
Таксама зменіцца меню: прыбяруць з продажаў шэраг пазіцый, напрыклад: «Біг Мак», «МакФлуры», «Хэпі Міл». Правядуць замену інгрэдыентаў, перайменаванняў страў і ўвядуць новыя пазіцыі.
Іншы супрацоўнік менскага рэстарана сеткі пацвярджае, што яна будзе працаваць пад уласным брэндам:
«Гэтай ноччу, гадзін да трох, пару чалавек выклікалі на пагрузачна-разгрузачныя работы. Як мне сказалі, канчаткова пазбаўляліся ад упакоўкі і ўсіх згадак «McDonald’s». Учора з’явілася пара новых дэсертаў, якія ёсць у расейскім «Вкусно – и точка». Але пакуль ніхто не ведае, якая будзе назва ва ўстановах.
Таксама крыніца паведамляе, што шыльды і лагатып першапачаткова хацелі зрабіць у каляровай гаме расейскай сеткі. Але, паводле яго слоў, інфармацыі аб продажы рэстаранаў уладальніку «Вкусно – и точка» Аляксандру Говару пакуль не было.
У адным з рэстаранаў сеткі ў Менску «Zerkalo» паведамі, што пад брэндам «McDonald’s» установы ўжо не працуюць і заявілі, што цяпер яны працуюць як «КСБ Виктори Рестораны».
Раней паведамлялася, што рэстараны «McDonald’s» спыняць працу ў Беларусі а 18:00 21 лістапада, а з 22 лістапада адкрыюцца пад брэндам сеткі «Вкусно – и точка» расейскага прадпрымальніка Аляксандра Говара, які пасля пачатку поўнамаштабнай вайны ва Украіне выкупіў амерыканскія рэстараны ў Расеі. Аднак у дзень анансаванага закрыцця рэстараны працягнуў працу, а некаторыя з іх нават вярнулі раней знятыя шыльды. «Наша Ніва» распавядала, што «McDonald’s» застаецца ў Беларусі, бо нібыта асабіста Аляксандр Лукашэнка забараніў мяняць франшызу.
У Беларусі франшызы ад самога «McDonald’s» не было, замест яе быў франчайзі «КСБ Виктори Рестораны», які заведваў сеткаю рэстаранаў «McDonald’s». Ягоны ўласнік – Кайрат Баранбай, казах са сваяцкімі сувязямі з Назарбаевым, цяпер на радзіме апынуўся пад следствам. Праз гэта рэстараны «McDonald’s» спынілі дзейнасць і ў Казахстане.
Алена Рувіна belsat.eu