Міністэрства фінансаў Беларусі апублікавала праект змяненняў у Падатковы кодэкс. Разбіраемся з прапанаванымі новаўвядзеннямі.
Паводле праекту, з ліку плацельнікаў падатку пры спрошчанай сістэме падаткаабкладання хочуць прыбраць індывідуальных прадпрымальнікаў, адвакатаў і натарыусаў, якія працуюць праз бюро. Спрошчаная сістэма (адпрыбытковы падатак 6 %) застанецца толькі для юрыдычных асобаў.
Таксама з 1 студзеня 2023 года чыноўнікі хочуць адмяніць адзіны падатак з ІП і іншых фізічных асоб.
А з 2024 года хочуць адмяніць збор у сферы аграэкатурызму, падняўшы папярэдне ў 2022 годзе яго суму да 31 рубля на месяц за адну аграсядзібу. Цяпер падатак для ўладальнікаў аграсядзібаў і рамеснікаў складае дзве базавыя велічыні на год – Br 58.
Падатак на перавышэнне расходаў над даходамі фізічных асоб могуць падняць з 16 % да 20 %. Таксама для іх увядуць новае паняцце – прафесійны прыбытак. Гэта даход фізічных асоб ад дзейнасці, пры вядзенні якой яны не маюць працадаўцы і не прыцягваюць фізічных асоб паводле працоўных або грамадзянска-прававых дамоваў, а таксама даход ад выкарыстання маёмасці.
У 2022 годзе ўлады хочуць таксама павысіць стаўкі адпрыбытковага падатку з фізічных асоб, якія здаюць у арэнду жыллё, гаражы, машына-месцы. Гэтак, у Менску падатак за здаванне аднаго пакою можа вырасці з Br 34,3 да Br 36,8, а ў абласных гарадах – з Br 32,2 да Br 34,5.
Таксама з наступнага года маюць вырасці стаўкі зямельнага падатку на нерухомасць. Гэтак, сярэднія стаўкі зямельнага падатку па раёнах могуць падняць прыкладна на 7,2 %.
Стаўкі акцызаў на алкаголь і цыгарэты з наступнага года таксама плануюць падняць, за 2 этапы – з 1 студзеня і 1 ліпеня.
МГ belsat.eu